Hnam Chhantu pawl huaihawtin vawiin khan Upper Republic-a an pawl pisa-ah tun leh nakin zela Mizoram dinhmun sawi ho a ni a, sawm bik thahnem tak an tel. He sawihona kaihhruaitu, Hnam Chhantu pawl President, Pu R. Ramhmangaiha chuan, tuna Mizorama thil thleng mek, Chakma chungchang chu ram leh hnam tana thil pawimawh leh lian tak a nih thu sawiin, MNF-in zalenna a sual tih lohah chuan Mizorama thil thleng lian ber nia ngaih a nih avangin a sawihona hi buatsaih an nih thu a sawi a, Central YMA President, Pu Lalbiakzuala leh Pu Lalrozara’n thu an sawi bakah Nagaland CM Adviser, Pu Lalthara thuziak zir ho a ni. Central YMA President, Pu Lalbiakzuala chuan, tuna ram dinhmun hian naktuk dinhmun tur a hril avangin ngaihtuahna hman fimkhur uluk a tul hle tih sawiin, ram leh hnam tana tha tur tihhlawhtlin kawngah politics-a ngaihdan inan lohna leh Kohhran thurin inan lohna-in harsatna siam lo se duh thu a sawi a, Chakma chungchang bakah, Mizoram hian eng harsatna nge a tawh mek tih bih chian a ngai hle tih sawiin, ram leilung faten an thawh theih reng an thawh loh avanga harsatna thleng mek chu siam that a tul a, hmasawnna tam tak lo thleng zel mah se, mipuiten zo nun zemawi an bosal chuan hmasawnna duhawm lo ber a ni dawn niin a sawi. Hnam humhalh ringawt a tawk lova, hnam him ringawt mah se, chenna tur ram humhalh tel a nih loh chuan hmasawnna khingbai a ni dawn niin Pu Lalbiakzuala chuan a sawi a, Central YMA kaihhruaina hnuaia NGO Coordination Committee-in Minister a nihna atanga Dr. BD Chakma bang tura an nawr chhan chu Chakma a nih vang hrim hrim ni lovin, ram danpui hnuaiah rinawm taka khua leh tui tha ni tura intiam chunga ram danpui kalha thil a tih vang nia sawiin, a ban loh chuan a ban ngei theih nan na zawka nawr zui a nih tur thu a sawi bawk.
Thusawitu dang, Pu Lalrozara pawhin, kum 1931 vel khan Mizoramah Chakma 800 vel an awm a, chhiarpui hnuhnung ber, kum 2011-ah chuan mi 90,000 chuang an tling tawh nia sawiin, Chakma zingah hian ram dang atanga lo lut tel lo sela chuan hetiang zat hian an pung thei lo tih a chiang hle niin a sawi a, tun hnaia Lok Sabha-a pharh tak, Citizenship (Amendment) Bill, 2016 hi pass a nih chuan, Mizorama Chakma awm zat hi nasa takin a pung thei dawn tih sawiin, he Bill-in a sawi anga ram dang atanga India rama lo lut, kum 6 awm tawhte chu India khua leh tui nihna pek an nih chuan Mizoram leh hnam tan a him loh theih dawn avangin tun aia nasa zawka dodal a pawimawh a ni, a ti bawk. Union Home Ministry-in Myanmar leh Bangladesh atanga raltlan leh dan lova lo lutte chu Muslim hel pawlte nena inzawma a puh angin, heng ram pahnih atanga dan lova lo lutte chu Mizorama atanga hnawtchhuak turin sorkar laipui leh Mizoram sorkar-in hma la nghal se a duh thu pawh Pu Lalrozara chuan a sawi a ni. He sawi honaah hian Political Party leh tlawmngai pawl hrang hrang aiawhte bakah mi thahnemngaite an tel a, Mizoram leh hnam tana an hmathlir leh ngaihdan hrang hrang an sawi ho nghal a ni. —————-
MNF Party-in tukin khan Aizawl khawpui chhung hmun hrang hrangah furpui Campaign an buatsaih a. Khawpui chhung hmun 10-ah beihpui thlakin, an Party hruaituten thu an sawi a ni. Zemabawk Bazar-a he beipui thlaknaah hian an pawl General Secretary, Pu Lalruatkima, MLA chuan, Zoram kal sual tur vengtu tura din, MPF office chu Congress mi leh sa-in an kal chilh nia sawiin, tuten emaw thudik an sawi avanga nà ti an awm chuan an inenfiah a ngai hle tihna niin a sawi a, kumin July ni 14 khan CM, Pu Lal Thanhawla’n Congress Bhavan-a a thusawiah, Congress mi ni lo chu eng atan mah a tih loh thu a sawi nia sawiin, hei hi an party rilru put hmang tichiangtu niin a sawi a, Congress sorkar chu mipui huap zo lo a nih bakah lal chhungkua leh party mi leh sa inlulinna leh invulhna sorkar a nihzia a nemnghet niin a sawi. Pu Lalruatkima chuan, nakkum Assembly inthlanah MNF-in thuneihna a chan chuan an hun hmasa ang bawkin mipui huapzo sorkar an siam tur thu leh SEDP hmangin hmasawnna an thlen dawn niin a sawi.
Khatla kawna thusawitu, PAC member, Pu K Sangthuama MLA chuan, sorkar ding lai thil tihdik lohte sawisel ngawr ngawr chu an tum a nih loh thu leh, an insiam that beiseiin an tihdik loh chu an sawi thin zawk niin a sawi a, tun thlenga insiam thatna hmuh tur a awm loh avangin khawlaiah mipuite hriatah an puangzar ta niin a sawi. Pu K Sangthuama chuan, Congress-in NLUP chu cheng 2 pe-a nuai khat dawnna tur angin mipuiah an zuar a, kum 2008 inthlan atangin an tlinpui a, mahse an sawi ang ni lovin, vawi khatah cheng sing hnih khat lek lekin an sem leh si nia sawiin, chhungkaw din chchhuahpuina khawp a ni lo niin a sawi. Pu K Sangthuama chuan, CAG-in NLUP a hlawhchham thu, a report-a a tarlan chu thu dik nia sawiin, CAG report chu a dik lo nia sawi phet tumna chu sim se a duh thu a sawi a, NLUP dawngtu zingah mi nei nung sa leh khawsa thei tak tak, mi
1,400 an awm tih pawh CAG report-ah a chuang nia sawiin, NLUP chu party induhsakna leh chhungte induhsak nan nasa taka hman niin a sawi bawk.
Khatlaa Tennis Court bula thusawitu, MNF thalai President, Pu Lalrinawma MLA chuan, sorkarin inkalpawhna kawng chhia chu tihngaihna a hre lo nia sawiin, mak a tih thu a sawi a, kawngpui chhiat chungchangah hian Assembly-ah pawh resolution an put luh tawh thu leh hnawl a nih thu sawiin, kawng hi siam that a nih loh avangin a kum telin a chhe zual zel a, nasa takin mipuiin an tuar zel nia a sawi bakah, Congress sorkar kal danah hian kawngpui that ngaihna a awm lova, kalphung thar a ngai niin a sawi. Pu Lalrinawma chuan, Health Care zawm ve turin mipuiin cheng 500 te, 750 te an chawi a, chuti chung chuan damlo inenkawlna senso chu hmuh leh a har leh hle si nia sawiin, enfiaha siam that a ngai hle niin a sawi bawk a ni.
