Independence Day champha vawi 70-na, naktuka lo thleng tur, ram chhung hmun dang ruala lawm turin Mizoramah pawh inpeih fel a ni. A lawmna inkhawm lian ber, Aizawl Lammuala naktuk zing dar 9-a tan turah CM, Pu Lal Thanhawla’n Hnam puanzar pawt pharhin Parade Contingent 28-te lam a endik ang a, zalenna hnam puanzar chibai an buk a chhang let bawk ang. Hemi hnu hian mipuite hnena thuchah a sawi ang a, ram pum huap leh Mizoram huapa hnathawk tha chawimawi tlakte chawimawina a sem ang a, parade-a tithate lawmman a sem bawk ang. Tun tuma Independence Day Aizawla lawmnaah hian Contingent 28 an lam dawn a, chungte chu ralthuam keng chi contingent 5, ralthuam keng lo chi 6, School contingent 13 leh band party 4 an ni. Tun hnai atanga tih thin angin Aizawla Independence Day lawmnaah hian Manipur-a 3rd IR Battalion pawh Armed Contingent zingah an tel dawn a, Mizoram atang pawhin Assam khawpui, Guwahati-a Independence lawmnaa lam turin 3rd Battalion MAP Contingent an kal a ni. Kum danga tih thin dan angin Larsap, Lt. Gen. Nirbhay Sharma chuan chhun dar 11-ah Raj Bhavan-ah mi pawimawhte thingpui a inpui leh ang.
District khawpui hrang hrang leh khawpui danga Independence Day hmanpui turin Minister-te pawh an kal dawn a, Lungleiah School Education Minister, Pu H. Rohluna, Saiha-ah Finance Minister, Pu Lalsawta, Tlabung-ah Assembly Speaker, Pu Hiphei, Champhai-ah Horticulture Minister, Pu PC Lalthanliana, Serchhip-ah UD&PA Minister, Pu Zodintluanga, Kolasib-ah Health Minister, Pu Lal Thanzara, Mamit-ah Food, Civil Supplies & Consumer Affairs Minister, Pu John Rotluangliana, Lawngtlaiah Parl. Secretary, Pu TT Zothansanga an kal ang a, MLA-te pawhin hmun engemawzatah an hmanpui dawn a ni.
