Kutthlaktu nia rinhlelh man te hi Sub-Divisional Judicial Magistrate Court, Kanchanpur, Tripura-ah an inlan a, heng mite Mizoram lama lak dilna, Transit remand chu Court hian hnawlin mi man te pawh Bail-a chhuah an ni tih Mizoram Police thuchhuah chuan a sawi. Court thutlukna hi Court sang zawka appeal tuma bawhzui mek a ni tih Mizoram Police te chuan an sawi a, dan hnuaiah a theih ang angin chak takin an bawhzui zel dawn tih an sawi.
Mizoram police thuchhuah sawi danin, IR Sipai pahnih, C. Lalhruaitluanga leh R.Zairemmawia te Chakma engemawzatin an sawisak rawn thu kalzelah Mizoram DGP chuan DIG CID kaihhruai High Level Enquiry a din a, report hi naktuk, ni 22 aia tlai lova thehlut tura tih a ni.
New Kawnpui Border Outpost-ah hian Armed Police Company khat, sipai Assistant Commandant hoa dah belh tawh an ni tih Mizoram Police hian an sawi a. New Kawnpui hi Armed Battalion Outpost a ni chungin Police Station lam mi MRP te pawh a tul ang zela dah tura tih a ni an ti.
