Janata Dal (United) chu a phel ngei dawn niin a lang ta a, vawiin khan he pawl hi a hranin an thu khawm a, Bihar CM, Pu Nitish Kumar-a kaihhruaite chuan sorkar laipuia rorel lai, BJP kaihhruai, National Democratic Alliance-ah tel leh an remti a ni. A hma khan JD(U) hi kum 17 emaw lai, NDA-ah hian an lo tel tawh a, NDA-in PM atana an candidate atana Pu Narendra Modi an thlan thu, kum 2013-a an puan khan Pu Nitish Kumar-a lungawi lo hian a chhuahsan ta thut a ni. Hemi hnu hian JD(U) hian Congress leh RJD thawhpuiin, Bihar-ah sorkar an siam a, mahse chawlhkar tlemte kal taah khan an thawhhona hi chhuahsanin, sorkar siamna kawngah BJP a thawhpui leh ta a ni. Patna-a vawiina an party national executive thutkhawmnaah hian JD (U) hian NDA-a tel leh an remtih tak avangin, sorkar laipuiah pawh an party mi pahnih vel, Minister-ah dah an nih rin a ni.
Hemi rual hian JD(U) hruaitu dang, an President hlui, Sharad Yadav-a chuan an pawl hruaitute zinga amah zuitu, mi 12 vel a kawm bawk a, ani hi BJP thawhpui chungchangah Pu Nitish Kumar-a nen an inrem lo hle a, vawiina a kawmte pawh hi amah an zui avanga JD (U) atanga chawlhtir tawhte an ni. Pu Sharad Yadav-a hi JD (U) dintute zinga mi leh an hruaitu hlun a ni a, BJP nena thawh dun hi a duh loh thu a sawi avangin Rajya Sabha-a an pawl hruaitu a nihna atang pawhin chawlhtir a ni tawh a, mahse Pu Nitish Kumar-a pawl hian a chungah hremna dang a la lek lova, mahse tun hma zawnga amah zuitu, JD (U) General Secretary, KC Tyagi chuan a pu hlui, kum 70 mi, Sharad Yadav-a hi na takin a vau tawh a ni. Tyagi-a chuan, Pu Sharad Yadav-a hi JD (U) national executive meeting-a tel a, an inrem lohna te pawh sawipui atan sawm a ni tih a sawi a, Lalu Yadav-a a biak that zel erawh chuan amah an rinna chu an hloh mai dawn niin a sawi.
