Rajya Sabha member thlanna neih turah hian nimin khan mi pathum-in Nomination Paper an thehlut a, chungte chu MNF Official candidate, Pu K. Vanlalvena, Congress Official Candidate, Dr. Lallianchhunga leh ZPM Official Candidate, Pu B. Lalchhanzova an ni.
Heng mite Nomination Paper hi vawiin khan he inthlanna neih tura Returning Officer, Assembly Secretary ni bawk, Pu H. Lalrinawma’n endikin, pawm vek a ni. He inthlanna neih tur hriattirna hi tun thla ni 2 khan tihchhuah a ni a, nimin khan inthlan chuh tumte tana hming pek luh theih hun hnuhung ber a ni a, Zirtawpni thleng khian inhnuhdawh theihnna hun hawn a ni a, he inthlannaa thil pawimawh zawng zawng chu tun thla ni 22-a tihfel vek tur a ni.
Mizoram aiawh tur Rajya Sabha member thlannaah hian MLA ten vote an nei a. Dan pangngaiah chuan rorel lai pawlin a thlawp chu tling tura ngaih a ni. MLA 40 awmna Mizoramah rorel lai MNF chuan MLA 27 a nei mek a, ZPM-in MLA 7, Congress-in MLA 5 leh BJP-in MLA 1 a nei a, MLA nei Political Party zingah BJP chu he inthlanna chuh lo awm chhun a ni a, BJP Mizoram State President, Pu Vanlalhmuaka chuan, an MLA-in inthlannaa a hawi tur lam chu an Party Core Committee-in a ngaihtuah tur thu Zonet a hrilh a ni.
