Court chuan MLA te chu Speaker Ramesh Kumar hi zan dar 6 rik hmaa Police-te venhimna hnuaia hmu turin a hriattir a, Speaker chu vawiin ngeia MLA te banna chu pawm theih a ni em tih relfel turin a ti a ni. Hemi hnu lawk hian Speaker chuan MLA te banna thehluh zirchianna hun pek belh turin court ah hian ngenna a thehlut ve leh nghal a, banna an thehluh hi anmahni duh thu renga thehlut nge an nih tih luihna-a thehluhtir tihte fel taka enfiah chu Speaker anihna anga a mawhphurhna a ni tih court ah hian a thlen a, MLA te banna thehluh chungchangah zanlai thleng tal hun pe turin a dil a ni.
Banna an thehluh hnuah MLA te hian Bengaluru a\angin Mumbai an pan a, Congress leh JDS \angdun sorkar a tluk lohna tura an banna thehluh ngaihtuah duh lovah speaker an puh a ni.
Speaker chuan heng miten banna an thehluh lai hian a office-ah a awm lo tih a sawi a, Thawhlehni khan lehkha te hi enfelin MLA 8 te banna thehluh chu fel lo a awm avangin a hnawl tih a sawi a, banna thehluttu MLA te chu ni 17-a amah hmu turin a hriattir tih a sawi.
MLA te banna hi pawm a nih chuan sorkar dinglai chu tlu mai thei dinhmunah a ding dawn a, BJP-in sorkarna a siam ngei rin a nih vangin Speaker hian an banna chu a pawm ngam lo niin, MLA te aiawha ding ukil chuan a sawi a ni.
DK Shivakumar-a’n Mumbai Five Star Hotel-a inkulh MLA hel te hmin tuma a hmalakna a hlawh chham leh tak avangin Congress tan an mite thlem lungawi leh theih a ni ang em tih chu zawhna lian tak a ni mek a ni.
