Tuna Supreme Court-a zualko leh te hi K Sudhakar, Roshan Baig, MTB Nagaraj, Muniratna Naidu leh Anand Singh te an ni. Politics boruak chiri tak karah rorellai leh eptu party MLA te hi hapta tawpah hian Hotel leh resort ang chitah te an inkhung hlawm a, MLA in thlem chhuah sak an hlau tawn ve ve a ni.
Zirtawpni-a Supreme court in MLA 10 te ngenna thlen chungchangah thil nih dan pangngaia kal rih tura a tih hnuah MLA panga te hi Supreme Court ah hian zualko ve lehin, heng te hi karleh tir lamah ngaihtuah a nih rin a ni a, Speaker KR Ramesh Kumar pawhin kar lehah chuan MLA banna thehluhte a chinfel tawh rin a ni.
Chief Minister HD Kumaraswamy chuan Spekaer hnenah hian a sorkar fiah tir tura ngenna a thlen tawh a, Nilaini khi sorkar fiahna ni-ah ruat a nih hmel a, Supreme Court chuan MLA te banna chungchangah hian Thawhlehni-ah thutlukna a siam rin a ni.
HD Kumaraswamy-a kaihhruai Karnataka \angrual sorkar, nikum May thlaa ding \an chauh hi MLA 18 in banna an thehluh avangin tlu mai thei dinhmunah a ding a, \angrual sorkarin MLA 118 a neih \hin chu 100 ah a tla thla dawn tihna a ni a, MLA te banna hi pawm a nih chuan Assembly-a Majority nei chin chu 113 ni tawh lovin 105 ah a tla thla dawn tihna a ni a, BJP chuan Member 105 chiah chiah nei mahse, independent member 2 thlawpna nen sorkar siam theihna khawp member an nei thei dawn tihna a ni.
