Kenya Supreme Court-in thla hmasaa President thlanna result hnawl

Kenya Supreme Court-in thla hmasaa President thlanna result chu vawiin khan a hnawl a, President hi thlan that lehna tur thupek a siam a ni. Eptu pawlte chuan court thuchhuak hi an hlawhtlinna niin an ngai a, Nairobi khawpuia he court leh mi retheite chen tamna hmunah te chuan President Uhuru Kenyatta thlan nawn leh a nihna hnawl a ni ta hi an lawm nasa hle a ni. Eptu pawl hruaitu, Raila Odinga chuan court thuchhuak chu thil chhinchhiahtlak leh lawmawm tak niin a sawi a, Kenya ram mipuite tan leh Africa khawmualpui tan pawh thil lawmawm tak nia sawiin, tun hi Africa khawmualpuia court-in President thlanna a hnawl vawi khatna a nih thu a sawi. Chief Justice, David Maraga chuan, Judge 7 zinga 5-in President thar thlanna chu dan ang thlap a ni lo-ah an ngai tih a sawi a, hei vang hian inthlan result pawh hi awmze nei lo leh pawm tlak loh nia ngaiin a hnawl ta tih a sawi. Chief Justice chuan President thlanna buatsaih kawngah hian election commission chu hlawhchhama a ngaih thu leh, ram danpui anga inthlan buatsaih thei lo nia a hriat thu pawh a sawi a, eptu hruaitu, Raila Odinga pawh hian kumin bakah kum 2007 leh 2013-ah khan inthlan hi a lo chuh tawh a, mipui tam zawkin an thlang chungin, dik lo taka thil tih a nih thin avangin a tla zel niin a lo sawi tawh a ni. Court chuan President thlanna hi ni 60 chhunga buatsaih lehna tur thupek a siam a ni.