Lunglei District-a Tlabung leh a chhehvel khuate chima Khawthlang tuipui lian chu a kam leh tawh a, Tlabung Branch YMA hruaitute hnen atanga vawiina thu dawn danin tuilian hi a kam leh tawh avangin Tlabung khuaa chhungkaw 5, tuilian vanga inthiar chhuakte pawh vawiin khan an lut leh tawh a, hemi hmalama tuilianin a chim Venghlun leh Dakin bul vel pawh tunah chuan tuilian hian a kam san leh vek tawh a ni. Hetiang bawk hian Tlabung chhehvela hmun hniam laia khaw thenkhat, tuilianin a chimte pawh nizan atang khan tuilian hian a kamsan leh tawh a ni. Hetihlai hian Sairang-ah pawh Tlawng lui lian chu nasa takin a kam tawh a, lui kam hniam laia nul leh huan siamna hmunte erawh chu tuilian hian vawiin thleng khan a la chim niin Sairang Branch YMA hruaitute chuan an sawi a ni.
