Mizorama Kohhran hrang hrangte chuan zanin a\ang hian Krismas programme an hmang \an dawn a, Kohhran lian ber, Presbyterian Kohhran chuan Synod thupui buatsaih angin Pathian biak inkhawmah Pathian thuchah sawi a ni ang a, zanin urlawk zan hian thupui atan ‘nula thianghlim Mari’n a hring a’ tih hman a ni ang a, Kohhran hruaituten he thupui tlawh chhan hian Pathian thuchah an sawi dawn a ni. Zanin hian Pathian fakin an zaikhawm bawk dawn a ni. Naktuk chawhma inkhawmah thupui atan ‘khualbuka leng lo Isua’ tih hman a ni ang a, Kohhran tam zawk chuan inkhawm banah thingpui ruai an kilho ang a, Krismas lawmna ruai erawh chu naktip, ni 26-ah an buatsaih dawn a ni. Naktuk, Krismas ni chawhnu inkhawmah chuan thupui atan ‘Itsikna tel lova nausen chibai buktute tih hman a ni ang a, inkhawm banah zaikhawm a ni ang a, zanah thupui atan ‘|hanlen dan entawn tlak Isua’ tih hman a ni ang a, heng thupuite hi Kohhran hruaitu thlanchhuahten an sawi dawn a ni.
Baptist Kohhran chuan a hranpain Krismas thupui an siam chaunglova, Kohhran hrang hrangah an remchan dan angin Pathianthu sawituten Krismas lam hawiin sermon an thlak dawn a ni. Kohhran dang ang bawkin Baptist Kohhran hian Krismas lawmna hi Biak In hrang hrangah an hmang ang a, inkhawm banah zaikhawm a ni ang a, naktuk, Krismas ni-ah chawhma inkhawm banah thingpui ruai buatsaih a ni ang. Aizawl Central Church-ah chuan naktuk zing inkhawm thupui atan remthu leng rawh se tih hman a ni ang. Chawhma inkhawm banah lengkhawmin Pathian faka zaiho a ni ang. Ni 26-ah Kohhran hrang hrangte chuan Krismas lawmna ruai an \heh ang a, nawn tura inbuatsaih Kohhran \hahnem tak an awm bawk.
Chhandamna Sipai pawl pawhin Krismas lawmna hi zanin a\angin an hmang \an dawn a, Territorial Headquarters leh Divisional Headquarters hotute chuan Corps hrang hranga insem darhin an hmanpui dawn a, Krismas chhung hian inkhawm ban apiangin zaikhawm a ni ang a, naktuk, Krismas ni-ah Corps tam zawkin thingpui ruai an buatsaih anga, naktip, ni 26-ah Krismas lawmna ruai an \heh dawn a ni. Headquarters atangin thupui hranpa siam a awm lova, Corps leh Society tin ten anmahni remchan angin an hmang dawn a ni.
Territorial Commander Commr. Lalzamlova te nupa chuan Krismas ni hian Ramhlun Corps-ah an hmang dawn a, zan lamah ITI Corps-ah an hmang anga, naktip, ni 26 chawhmaah Durtlang Corps-ah an hmanpui thung dawn a ni. Personnel Secretary, Lieut-Colonel Vanlalthanga te nupa-in Bazar Corps-ah an hmanpui anga, Business Secretary Lieut-Colonel Lalbulliana ten Durtlang North Corps-ah an hmang anga, Programme Secretary, Lieut-Colonel Zothanmawia te nupa-in Chanmari West Corps-ah an hmang thung ang. Salvation Army Temple Corps chuan kumdanga an tih \hin angin zanin hian Temple tualah Coffee Nite an buatsaih leh dawn a, heta \anga an sum hmuh hi mirethei leh \anpui ngaite \anpui nan an hmang dawn a ni. Zanin vek hian Synod Revival Speaker, Federick Lalrindika chuan Pathian thuchah tawi a sawi dawn a, hei hi Zonet chuan Live-in a pe chhuak dawn a ni.
Roman Catholic Kohhran pawhin zanin a\ang hian Krismas lo thleng urhsun takin an lawm dawn a, Aizawl Bishop Most Rev. Stephen Rotluanga chuan zanin dar 11:30-ah Kulikawna Christ the King Cathedral-ah Kohhran mite hmanpuiin Lalpa Zanriah a buatsaihsak ang a, hetiang bawk hian veng hrang hrang leh khaw hrang hranga Roman Catholic Kohhran te chuan an Biak In \heuhah zanin inkhawmah Mass thianghlim neiin Lalpa Zanriah buatsaih a ni ang. Roman Catholic Kohhran zingah hian naktuka Krismas lawmna ruai \heh tur an awm nual a, amaherawhchu a tam zawk chuan naktip, ni 26-ah a lawmna ruai an \heh dawn a ni.
