Health Minister Dr. R. Lalthangliana hova vawiina sorkar hotute \hukhawm chuan covid 19 vei rinhlehte buaipui dan tur hi an ruhman fel a, Zokhawthar-a khualzin endikna Survelliance & Screening Centre ah darkar 24 duty dah an rel a, hemi hmalam hian office hun chhung chauh duty dah an ni. Hei bakah hian ram dang a\anga Mizoram rawn luh theihna khan hrang hrang-a khualzinte endikna \ha zawk a awm thei nan leh ram dang a\ang lokal mikhual insawisel te chu rang tak hriatchhuah a, dah hran an nih theih nan ramri a awm khaw hrang hranga YMA Branch leh VC te bakah paramilitary forces te thawhpui nise tih an rel a ni.
Health Minister hian, covid 19 chu khawvel pumah buaipui a nih thu a sawi a, he hri laka Mizoram a him theih na turin sorkar pawhin a theih ang angin hma a la a, a vei an awm thulha enkawl dan tur pawh ruahman a ni tawh tih a sawi a, mipuite chu chiai lo tur leh thuthang dik lo laka fimkhur turin a chah a ni.
Chief Secretary Pu Lalnunmawia Chuaungo pawhin he hrileng, covid 19 chungchangah hian mipuite zirtirna pek uar a pawimawh tih a sawi a, fimkhur tura mimal tin zirtir an \ul rualin, mipui ti phawklek zawnga inzirtir palh a hlauhawm a, taksa invawnfai kawngah zirna in leh college ah te inzirtirna buatsaih a pawimawh a ni a ti.
Health Secretay Pu H. Lalengmawia chuan, \henawm ram Burma chu hetiang thila khawlvel hriat-a a in phochhuak lo \hin chu an buaina ber a nih thu a sawi a, hrileng dangah pawh a buaithlak \hin tih sawiin luhna khan a tam si a, Burma-ah he hri kai hi an awm tawh em tih chu an rilru tibuaitu a nih thu a sawi. Health Secretary sawi danin Sample collection centre chu Lengpui, Civil Hospital leh Falkawn ah te dah a ni a, Sample erawh Guwahati-ah thawn ngai thung a, ram dang a\anga Mizorama lo let hlim, sorkarin awm hrang rih tura a tih mi 7 te zingah he virus kai hi an la awm lo tih a sawi.
