Khawzawl Dist. tihpuitlin phutin Khawzawl District Implementation Demand Committee huaihawtin tukin dar 5 atanga tlai dar 5 thleng khan Khawzawl khaw chhungah Total Bandh neih a ni. Bandh neihna chhan hi Khawzawl District siam tum, a nih dan ang tura hnathawhtir thuai tura sorkar an nawrna a ni a, Khawzawla kan Corr. sawi danin bandh neih chhung hian Aizawl lam kawtchhuah, Champhai lam kawtchhuah leh veng hrang hrangah District Implementation Demand Committee hruaitute leh an mahni puibawmtute an duty a, mihring pawn chhuak an awm lova, sorkar pisa zawng zawng, zirna in zawng zawng, dawr zawng zawng leh sumdawnna hmunte khar a ni a, lirthei veivak a awm lo a ni. Bandh neih chhung hian Khawzawl SDO (Civil), Pu Lalremruata Sailo leh Police-te an duty a, buaina leh pawi khawihna lam chi erawh chu engmah a thleng lo a ni. Khawzawl District Implementation Demand Committee-in Bandh a huaihawt-ah hian Khawzawl bula Chawngtlai khua atang pawhin mi engemaw zatin Bandh duty-te an pui a, Ngaizawl leh Neihdawnah pawh an thil phut thlawp nan vawiin khan bandh hi neih a ni.
