Khawzawl District Implementation Demand Committee chuan MNF sorkarin kum 2008-a Khawzawl District siam a lo rem tih tawh, a nih dan tur anga hnathawh tir thuai turin sorkar a phut. Hemi chungchanga nimin a Khawzawl Vengthar BRC Training Hall-a Khawzawl District Implementation Demand Committee thukhawm chuan tun thla ni 12, tunkar Inrinni ral hma a hna thawh tir a nih loh chuan tun thla ni 14, karleh Thawhtanni zing dar 5 atanga tlai dar 5 thleng Khawzawl pumpui huapin Total Bandh neih an tum tih an tarlang a ni. He inkhawm, an Chairman Pu Malsawmdawngliana kaihhruai-ah hian Khawzawl District a nih dan tur anga tipuitling tura tun hma lama sorkar hotute an dawr dante, tawngkam tha chauh dawnga a tak tak a thil tih awm si lo chu a beidawnthlak niin an sawi a, Resolution Pass in an lungawi loh thu an tarlang a ni.
