Health Minister Dr R Lalthangliana sawi danin vawiin chawhma lam khan AMRI Hospital, Kolkata-a Cancer natna avanga inenkawl lai mi pakhatin COVID-19 a kai tih hmuh chhuah a ni a, chawhnu lam khan AMRI Hospital-ah vek hian Cancer natna vanga enkawl lai Mizo pakhat dangin a kai tih hmuhchhuah leh a ni. COVID-19 natna vei hmuhchhuahte hi mipa ve ve an ni.
Health Minister chuan mipuite leh Kolkata lama awm Mizote chu chi-ai lo tura ngenin sorkarin theihtawp chhuahin a tul ang angin hma a la nghal a ni a ti a, West Bengal sorkara Health & Family Welfare Department Principal Secretary pawh phone hmangin a be pawp nghal tih a sawi. West Bengal sorkara Health changtu Chief Minister Pi Mamata Banerjee pawh lehkha thawn nghal a tum thu a sawi.
Hetihlai hian Mumbai Mizoram House a COVID-19 positive hmuhchhuah pariat zinga panga chu an negative tawh a, damdawi in atanga chhuakin, quarantine facilities ah an awm mek tih Health Minister hian a sawi bawk a, midang pathum pawh an dinhmun a tha a, an test result pawh hriat theih thuai beisei a ni a ti.
Health Minister hian ZMC a COVID-19 natna vei enkawl mek pawhin hma a sawn zel tih a sawi a, vawiin chhun khan ICU atangin Isolation Ward ah sawn chhuah a ni, a ti a, ngaihtuahawm a ni tawh lo tih a sawi.
