Vawiin khan Aizawl SP, Pu Neihchungnunga’n Rangvamual-a Temporary Police Beat Post a hawng a, Rangvamual khawtlang mipuite chu thawhpui-ah sawmin, Rangvamual leh a chhehvela mipuiten krismas leh kumthar muanawm tak an hman theihna tura Beat Post hi hawn a nih thu a sawi a, mi dang tana hlauhawm leh harsatna thlen tur ni lovin, mipuite thlamuan tura awm an nih thu a sawi. Rangvamual Police Beat Post atan hian Ch. Chhunga Truck Terminal bul-a AMC building chu luah a ni a. Police officer leh thawktu engemawzatin, kumthar January ni 7 thleng an \hut chilh dawn a ni. Beat Post-a an duty chhung hian Prison Van leh Breath analyser-te an kawl ang a, he Beat Post hi Mobile number 7641039431-ah biak theih a ni ang.
Excise & Narcotics Department pawhin Krismas leh Kumthar vuakvet laiin mipuite’n thlamuang leh him taka hunpui an hman theihna turin \an an la mek a, district khawpui hrang hrangah Duty Post siam belhin, khualzin phur motor khalhtute zu in leh in loh finfiah nan Breath analyser hmangin motor kalhtute an endik a,
Ruihhlo hman khawlohna venna atan Aizawl khawpui kawt chhuahah ngawrh takin an duty bawk. Tuirial Airfield Veng-ah leh Rangvamual-ah Beat Post siamin Officer leh thawktu dangten an vil reng bawk a, Excise & Narcotics Department hian Krismas leh Kumthar vuakvetah dan bawhchhiaa vantlang hmuna zu in lo tur te, zu in hnua lirthei eng chi mah khalh lo tur leh ruihhlo laka fihlim tura mipuite an beisei thu an sawi a ni.
