Law and Judicial Minister, Pu Lalsawta’n Lokayukta Chairperson leh member tur te Search Committee in thlang fel tawh tih a sawi. Vawiina Assembly Budget Session zawhna leh chhanna huna MPC member, Pu Lalthanliana zawhna chhanga he thu hi sawiin Pu Lalsawta chuan, Chairperson leh member tur, mi \ha ni ngaihte chu search committee-in a thlang fel tawh a, pawmpui turin Selection Committee-ah thawn fel tawh a ni a ti a, thutlukna chu Selection committee kuta awm a nih thu a sawi. Law Minister chuan, Lokayukta din tur hian hna 35 la thar tura ruahman a nih thu a sawi a, hemi atana Recruitment Rules pawh peihfel tawh niin, tunah hian DP&AR ah hnaruak hnawhkhah phalna dil mek a ni a, an phalsak hun hunah tihfel nghal a ni ang a ti. Pu Lalsawta chuan, Sorkar-in Building neihna a neih loh avangin Lokayukta luah tur in pawh thlan fel a nih tawh thu leh a building pawh chei\hat tum mek a nih thu sawiin, in neitute nen pawh inremna, ‘rent agreement’ siam tura buaipui mek a ni tih a sawi.
Law Minister-in zawhna a chhan zawha thil nihphung sawfiahtu House Leader, Chief Minister nibawk Pu Lal Thanhawla chuan, Lokayukta din tura hmalak chak a nih theih loh chhan chu Chaiperson leh member-ah hnam dang dah lova Mizo ngei dah an duh vang a nih thu a sawi a. Hemi piah lamah hian Selection-ah Chief Minister, Gauhati High Court Chief Justice leh Oppostion Leader an awm avangin an hman tlan hun nghah a ngaih \hin a, thil tih a harsa deuh \hin niin a sawi.
