Lebanon sipaiten Syria nena an inrina bula inkhuar, ISIS mi firfiakte bei turin an thawk chhuak tih an sawi a, thuneitute chuan Ras Baalbek khaw bulah ISIS mi firfiak pawlte hi an la inkhuar thu leh, helai hi Lebanon ramri hrula an awmna awm chhun a nih tawh thu an sawi a, sipaite hian rocket leh helicopter bakah laipui hmangte-in an bei tan phawt niin an sawi. Lebanon sipai hotu, General Joseph Aoun chuan ISIS mi firfiak pawlte laka beihpui thlak hi an sipai ruk bote leh an ram tana thite tan an hlan tih a sawi.
Syria sorkar sipai leh Shia Muslim pawl lian tak, Hezbollah tang dun chuan Syria ram lam atangin Baalbek bula ISIS mi firfiakte lakah hian beihpui an thlak tan ve bawk a, mahse Lebanon sorkar leh an sipaite nen hian an inthurual loh avangin, a hran ve ve-in an che niin an sawi bawk. Lebanon sipai thupuangtute pawhin Syria ram chhunga luh an tum loh thu leh, an ram chinah chauh beihpui hi thlak an tum thu an sawi a ni.
