Environment Forest and Climate Change Minister, Pu TJ Lalnuntluanga’n NIT hmun tur buatsaih mek hi tukin khan a tlawh a, Forest Clearance an neih loh vanga hnathawh tih thuanawp a nih loh tur a sawi.
Lengpuia NIT hmun tur hi kum 2014 khan buaipui tan a ni a. Helai hmun hi Lengpui VC-in Land Revenue and Settlement kaltlanga an pek ni mahse, a hmun thenkhat hi Forest Reserved Area huam chhung a nih avangin hna chhunzawm theih lohvin a awm a ni.
Helai hmun enfiahtu Forest Minister, Pu Manuna chuan, Chief Minister, Pu Zoramthanga’n Department inkara inbiak pawhna lam \hat tawk loh vanga hmasawnna tih thuanawp chu \ha a tih loh avangin Lengpuia NIT hmun chungchanga harsatna thleng pawh hi tun hnai khan Higher and Technical Education Department, Land Revenue and Settlement, Environment Forest and Climate Change, Law Department leh NIT hotuten sawi hovin, harsatna an neihte sutkian dan tur an ngaihtuah thu a sawi a, inbiakremna an neih danin NIT hian Forest Clearance nei rih lo mah se, Forest Department chuan harsatna siam lova hna an thawh chhunzawm an phalsak dawn tih a sawi.
Hetihrual hian Higher and Technical Education Department chu Nodal Department a nih angin NIT ram tana thil tihfel ngai awmte chu hnathawk chungin a buaipui ang a. Danin a sawi anga thil pawimawh neih ngaite an buaipui dawn tih a sawi a. Departnment kalphung in ang lo leh inhriat pawh tawn lohna vanga hmasawnna hnathawh khaihlak awm palh thei chu pumpelh tura hmalak chhoh zel tum a nih thu Pu Manuna chuan a sawi.
Minister-in Lengpuia NIT hmun a tlawhnaah hian a kaihhawih Department hrang hrang hotute an tel a, NIT hotute chuan, tunah hian Campus chhung inkalpawhna leh a hungna siam zawh thawkhat a ni tawh a, Building sakna tur sum pawh Central a\anga pek chhuah mai theih tura ruahman fel sa a ni tawh tih an sawi a. Forest Department lam nen engemaw harsatna an neih avangin sum hi an dawng thei rih lova, tunah inhriatthiamna hmanga Forest Department lamin hnathawh an phalsak tak avangin sum hi an dawn thuai an rin thu leh hna pawh tan theih thuai an inbeisei thu an sawi.
NIT hotute chuan, a tirah an campus chhung hmun thenkhat chu Forest Reserved Area a ni tih an hriat loh thu leh an phalna lak a ngai tih an hriat loh thu an sawi a. Minister tawiawmtu Forest Department hotute pawhin, harsatna siam an tum hrim hrim vanga tun dinhmun hi thleng an nih loh thu leh NIT lam hian hmalak phalna an dil a nih chuan remtih sak tura an lo inruahman lawk thu an sawi a, dilna an hmuh tak si lovah chuan dan anga hmalak a ngaih bawk si avangin tun dinhmun hi an thleng ta tih a sawi.
NIT ram chungchanga a kaihhnawih Department hrang hrangin inhriatthiamnaa hmalak chhunzawm an remtih avang hian a ram chin tichiang tur leh endik turin tun thla ni 24 hma hian Joint Verofication neih a ni dawn a ni.
