Lengteng Block ZPM-in Mimbung Public playground-a Block Conference an neih chu he bial viltu, Pu H. Ginzalala’n a hmanpui a, Pathian leh mipui zara thuneihna an chang a nih chuan, Lengteng bial hmasawnna turin mithiam an ruai ang a, Road Map leh Master Plan mumal tak siamin, an bial chu Model Constituency-a siam a tum dawn tih a sawi.

Pu H. Ginzalala chuan, Lengteng bial chu bial kilkhawr leh hmasawn mamawh tak a nih avangin a bika ngaihsak a ngai niin a sawi a, hemi atan mawhphurhna a chunga hlan a nih chuanan bial chhunga mi harsate leh damlote thlenna atan Aizawlah Lengteng House sak a ni ang a, chutah chuan Constituency Development Committee leh Village Development Committee Office hawn tur niin, Lengteng bial hmasawnna turin theihtawp an chhuah dawn tih a sawi.

|angrual pawlin a lo siam tawh angin ZPM-in thuneihna a chang a nih chuan sawhthing Kg. khat Rs. 50 in an lei ngei dawn tih sawiin, Pu H. Ginzalala chuan, sawhthing hi an lei satliah mai dawn lova, a sawngbawlna tur, Processing Unit din a ni dawn a, nizung chakna hmangin a ur rona tur ‘Solar Drier’ bun a ni ang a, a her dipna khawl pawh a tul anga bun a ni dawn niin a sawi. He inkhawm hi Lengteng North Block ZPM Streering Committee Chairman, Pu Zairimawia’n a kaihruai a, ZPM Gen Hqrs. hruaitu engemaw zatin an hmanpui bawk.