CM, Pu Lal Thanhawla’n Lottery-a sum hmanna dik lo nia sawi chu CBI chhuitir a nih tur thu a sawi. Congress Bhavan-a vawiia inkhawmah he thu hi sawiin CM chuan, Lottery chungchangah hian sorkar chuan thil dik lo a awm a hre lova, heti chung hian MNF-in an ngen angin CBI-in a chhui theih nan a bawhzui a, tunah hian Lottery Agent pahnih chu Court-ah an inkhin avangin CBI koh luhna tur chu duh angin a la hlawhtling thei rih lova, an thubuai hi chin fel a nih veleh CBI-in chhui zui tlaka a ngaih chuan koh luh nghal a ni dawn niin a sawi. Parliamentary Secretary-te chawlhtir tura Prism-in an ngen chungchangah Pu Lal Thanhawla chuan, Supreme Court thuchhuak anga Parliamentary Secretary-te dinhmun chhui chiangtu tur hian mi thiam ruat an ni dawn a, an thurawn a zira bawhzui a ni ang, a ti a, amah pui tura Cabinet Minister zinga mi, Pu Lal Thanzara ruat a nih dan chu a fel lo lo nia Prism-in an sawi chu thil an hriat chian loh vang nia sawiin, CM-in amah pui turin a duh duh a ruat thei niin a sawi. CM chuan, eirukna lakah amah chu a fihlim fai vek avangin a kaihhruai sorkar pawhin eirukna a do ngam niin a sawi a, NLUP-a sangha supply a nih dana thil dik lo awm nia sawi pawh mi tam tak mak tih hial khawpin sorkarin ACB a chhuitir nia sawiin, Mizo zingah hlemhletna chu sum eirukna chauh emaw ti an awm a, hei hi a dik lova, hun eiruk te, mahni hna-a inthlahdahte pawh eirukna vek a ni, a ti a, MLA leh Minister zingah an thuneihna hmang suala sum siam nana hmang an awm chuan, chu pawh chu eirukna dik tak a ni, a ti bawk. He inkhawm hi MPCC General Secretary, Pu RL Vala’n a kaihruai a ni.
