Mamit District huam chhunga ram khua leh tui mi dik tak, pianphunga rualbanlo, vote nei awm zat hriat theih nan anmahni zawn chhuah hna tan thuai a ni dawn. Hemi chungchang hi Mamit Bawrhsap, Pi Lalbiaksangi, District Election Officer ni bawk hovin nimin khan a Office-ah sawiho a ni a, he hnathawk tur hian Polling Station hrang hranga Booth Level Officer theuh te leh Mamit District chhunga Social Welfare Deptt. officer te ruat an ni a, an thil hmuh dan chu kum April ni 15 hmaa Mamit Bawrhsap hnena thehlut tura hriattir an ni. Hei hi Election Commission duh dan anga pianphunga rualbanloten harsatna nei lova vote an thlak theihna tur siamsakna tur a ni.
