Meghalaya-a kum 10 chhung Congress rorelna chu titawpin, vawiin khan National Peoples’ Party NPP President Conrad Sangma chu Meghalaya Chief Minister atan rinawmna thu tiam tira lakluh a ni ta a. Meghalaya Chief Minister 12-na a ni. Inthlanna-ah party mala sorkarna siam thei an awm lo a, Governor Ganga Prasad chuan Sangma hi sorkarna siam turin a sawm a, Sangma hian thlawptu MLA 34 a nei a ni. Sorkar thar lakluhna inkhawm Raj Bhavan-a neihah hian Union Home Minister Rajnat Singh leh BJP President Amit Shah te bakah North East Democratic Alliance Chairman nilai Assam Finance Minister Himanta Biswa Sarma te pawh an tel a ni. Meghalaya inthlannaah hian Congress party chuan MLA ngah berin 21 an nei a, NPP hian 19 an nei thung a, MLA 2 neitu BJP chuan NPP leh UDP te chu congress ni lo sorkar din turin an nawr nghal a, UDP hian NPP hi an thlawp thu an puan tak avang leh Hill State Peoples Democratic Party HSPDP leh BJP bakah Independent MLA ten NPP an thlawp tak bawk avangin NPP hian sorkar an siam ta a, party mala MLA ngah ber Congress chu eptu lamah an thu dawn ta a ni. Congress Chief Minister kalchhuak ta Dr Mukul Sangma chuan BJP chu tualto party te dik lo taka thlemah a puh a, UDP te chu sorkarna siampui turin an sawm ngei tih sawiin, term chanve annin an hruai hnuah Congress in term chanve dang hruai se tiin rawtna an thlen tih a sawi a, sorkar ngelnghet din a nih theihna tur anih beiseiin chan pawh huamin hma kan la a ni a ti. Union Home Minister Rajnat Singh a’n tunhma zawnga hmarchhak biala Congress Party chauh ding chang thei anga ngaihna chu thlakin a awm ta a ni a ti a. NPP kaihhruai sorkar thar lakluhna-a a tel hnuin he thu hi chanchinbumite hmaah a sawi a, Rajnat Singh chuan Conrad Sangma chu a lawmpui thu sawiin, hmarchhak biala congress chauh ding chang theia ngaihna awm thin chu BJP chuan a thlak danglam mek a ni a ti.
Nagaland ah sorkar siam tura Neiphiu Rio kaihhruai NDPP leh BJP te hmalakna chuan a tak ram a thleng tan dawn niin a lang a, North East Democratic Alliance Chairman nilai Assam Finance Minister Himanta Biswa Sarma chuan Inrinni kalta khan Kohima tlawhin, BJP dinhmun hi a ti chiang thawkhat tawh a, kum 15 zet a lo thawhpui tawh NPF chu BJP hian a thlauhthla fel thei dawn ta nia hriat a ni. Neiphiu Rio leh Himanta Biswa Sarma te hi Kohima ah hmalak dan tur sawiin an inkhawm a ni. NPF Chief Minister nilai TR Zelianga chuan BJP chu a party NPF kum tam tak chhung lo thawhpui tawhtu a nih avang leh tunah pawh a thlawpna a la tihtawp loh avangin BJP nen hian sorkar an la siam thei dawn a ni a ti a, hei vang hian Chief Minister anihna atangin a bang duh lo a. He harsatna chingfel tur hian Himanta Biswa Sarma hian Kohima hi a pan a, NDPP hruaitu Neiphiu Rio nena an inkawm hnuah BJP hotu pawimawh dangte nen chanchinbumite kawmin hetah hian Himanta Biswa chuan BJP chu NPF nen an thawk dun tawh lo tih a puang a ni. Himanta Biswa hian BJP leh NDPP te chu an thawh dun thu sawiin, Chief Minister nilai TR Zeliang chu zahawm taka amah inhnukdawk mai turin thurawn a pe a, hetianga Himanta Biswa Sarma thusawi hi NPF lam chuan BJP thutlukna ni lovin a mimal thutlukna mai a ni an ti thung.
Puan tawh angin BJP leh NDPP te hi inthlan hma atanga tangdun an ni a, sorkar an siam thei tih Governor hnenah hriattir tawh mahse, Chief Minister TR Zeliang chu a inhukdawk duh lo a. NDPP leh BJP tangdun hian seat 29 an lak laiin NPF party, Zelianga kaihhruai hian NPP MLA 27 te bakah an thawhpuite nen member 30 an nei niin an insawi ve thung a ni. NDPP leh BJP te hian MLA hming 32 thehlut mahse, MLA tam takin signature an pek loh avangin signature fel tak nena thehlut tha leh turin Governor chuan a lo hrilh a, NDPP leh BJP te hming thehluh hi NDPP MLA 18 bakah BJP MLA 12 te hming leh JDU MLA 1 leh Independent pakhat hming a ni. Governor hian Nagaland-ah sorkar ngelnghet leh chak tak din chu a thil duh ber a nih thu sawiin BJP pawhin kum 15 zet an lo thawhpui tawh NPF lakah an kut an silfai hmasak ve a tul a ni a ti a, Neiphiu Rio pawl leh TR Zeliang-a pawlte hi Governor hian thlawptu an ngah tawk a ni tih an finfiah theihna turin hun a pe ve ve a ni.
