Minister hlui, Pu Zakhu Hlychho chu vawiin chawhnu dar 1:30 khan Aizawl Civil Hospital ICU-ah Stroke avangin a boral a, kum 74 mi a ni. Pu Zakhu Hlychho hian a nupui, Pi Suipari, fapa pakhat, fanu panga leh tu pathum a kalsan a, a ruang hi Chaltlanga an chenna inah laka, a thlahna hun hman hnuah vawiin tlai khan Siaha Vengpuia an chenna ina vui tura lak a ni. Zakhu Hlychho hi Pu Laimo Hlychho leh Pi Khuangchii te fapa a ni a, Siaha bula Maubawk khuaah kum 1943, December ni 15 khan a lo piang a, kum 1967 khan Shillong-a St. Edmund’s College-ah BA a passed a, hemi hnu kum 1968 leh 1969 chhung khan Siaha Govt. High School-ah zirtirtu a ni. Kum 1970 khan Mara Freedom Party-ah lutin Politics a zawm a, hemi kuma Pawih-Lakher Regional Council inthlanna-ah thlan tlin niin Chief Executive Member-ah hlan kai a ni a, kum 1972-a Mizoram UT-a hlan kai a nih ruala Pawih-Lakher Regional Council atanga Pawih-Lakher leh Chakma Autonomous District Council, a hrang theuha siam a nih hnu khan Lakher Autonomous District Council, Mara Autonomous District tia vuah takah Chief Executive Member hmasa ber a ni. Mara Autonomous District Council-ah hian MDC atan tum 4 thlan tlin a ni a, dinhmun pawimawh tak tak chelhin kum 1982-ah khan Chief Executive Member-ah dah leh a ni. Kum 1993-a Mizoram Assembly inthlannaah khan Saiha Constituency atangin MNF ticket-a MLA atan thlantlin a ni a, hemi hnu hian Congress Ministry-ah Minister of State-ah lakluh a ni a, Transports, Labour & Employment leh Fisheries te a enkawl a, kum 1997 khan Cabinet Minister-ah hlan kai leh niin Horticulture Cooperation leh Labour & Employment te a enkawl a ni. Pu Zakhu Hlychho hi kum 1998 Assembly inthlanah khan Saiha bial atangin Congress ticket-a thlan tlin leh a ni.
