Dawr lian, shopping mall ang chi te leh bazar hmunpui ang chi te tiam lovin thingtlanga dawr zawng zawng leh khawpui chhunga, dawr mal din ang chi ho te leh veng chhung dawr ang chi te chu Home Ministry hian hawn theih an ni tih nizan khan hriattirna a tichhuak a, hei hian Coronavirus darh zualna hmun te erawh a huam lo thung. Mizoram sorkar chuan vawiin khan Mizorama mipui kharkhipna thupek hmanlai siam danglam hretna a tichhuak a, thil lian tham tih danglam erawh a awm lo a ni.
State Disaster Management Authority-a, State Executive Committee Chairperson, Chief Secretary Pu Lalnunmawia Chuaungo in vawiina mipui kharkhipna thupek siam danglamna a tih chhuahah hian thupek ding laia awm lo, Mizoram chhunga bungraw awm sa hmun danga phurh sawn dawnin bungraw phur turte awmna hmun District Deputy Commissioner-ah phalna lak tur a ni tih tarlan belh a ni a, Bank, Non-Banking Financial Institution (Housing Finance Company tiamin), Micro Finance Institution, NBFI leh MFI te chu staff tlem thei ang ber nen an kal ang tih belh a ni bawk a, Cooperative Credit Society (CCS) te pawh phalna hranpa ngai lova kal thei tur zingah telh belh an ni.
Nitin mamawh, Essential Commodities dah khawmna, Kudam ang chi te pawh phalna hranpa ngai lova hawn turte zingah telh belh a ni a, thingtlang lam miten ramhnuaia chawhmeh zawn leh thing lak ang chi te phal belh a ni bawk a, Mau/rua, kuhva rah, hmarcha, sawhthing leh chawhmeh sawngbawlna lama hmalakna hrang hrang, phun, chin, tharchhuah, seng, sawngbawl leh hralh te pawh phal a ni.
