ZNP President, Pu Lalduhoma’n Mizo mipuite beidawnga siamtu chu MNF leh Congress party niin vawiina an party chhung inkhawmah a sawi a, mipui an beidawn tawh avangin, mi dang pawhin thuneihna chang se, engmah an ni bik chuang lovang tih tawngkam a leng mek nia sawiin, heti khawpa Zoram mipuite tibeidawngtu chu kum 33 chhung roreltu, Congress leh MNF Party niin a sawi. Sorkar \ha pawh beisei ngam tawh lo, mi dang pawh lo ni leh sela engmah ni lo tur hial khawpa tibeidawngtute chu Zoram hian a hnawl ngam a ngai tawh niin a sawi. ZNP President chuan nakkum Assembly inthlanpui lo awm tur chungchangah, MNF emaw Congress emaw an ni leh mai dawn a, a ngai bawk a ni leh dawn tih tawngkam a lar hle nia sawiin, tunah hian MNF ni lo, Congress ni lo, 2018-a sorkar siam thei tur, Zoram Peoples Movement (ZPM) a ding tawh a ni, a ti a.
Anni chuan mipui an tibeidawng ve dawn lo a, mipui an la bum ve lo nia sawiin, mipuiten an luak hnu an ei tawh loh nan chaw tui tak chhawpin an awm tawh niin a sawi bawk.
ZNP President chuan Myanmar-a Rohingya hnam raltlante Mizoram-a an lo luh lohna tura inven lawk a ngaih thu sawiin, Rohingya hnam hi Arakan state Myanmar-ah maktaduai 1 leh a chanve vel an awm a. Myanmar sorkar nen an inkarah harsatna a awm avangin tunlai hian an chhuak nasa a. Bangladesh sorkar pawh nasa takin a inpuahchah mek a. Manipur lama luh phei leh an tum nia a lan avangin Manipur CM-in ramri lamah nasa takin hma a la a, an state chhungah heng Rohingya ho hi an luh an remti lo a. Myanmar ram chhuahsante hi Bangladesh leh Manipur-ah an luh theih bawk si loh avangin vengtu awm ve lo, sorkar inthlahdahin a enkawl mek, Mizoramah hian an lo lut ang tih hi a hlauhawm hle a ni, a ti bawk. ZNP President chuan nimin Pathianni khan Congress party-in zaithiam \henkhat hnenah Rs. 14,000 an sem nia sawiin, zaithiam \henkhat, vote zawn nan leh lam\ang siam nana Pathianni lehnghala ko khawma pawisa pe-ah Congress chu a puh a ni.
