State Referral Hospital hotute hnen atanga Zonet thudawn danin, damlo hi April ni 24 khan a Sample endikna atangin Covid 19 hrik hmuh a ni ta lova, hei hi sorkar inkaihhruaina anga finfiahna tling a nih nghal mai loh avangin a zawnin dar 24 danah Sample pahnih lak leh a ni a, Sample hi Silchar lama endik tura thawn a nih hnuah Covid 19 hrik hi hmuh a nih loh avangin hri lakah hian a fihlim tih puan a ni ta a ni.
State Referral Hospital hotute chuan, damlo hi a taksa pawh a chak chho zel a, ngaihtuahawm a ni tawh lo tih an sawi a, ICU-ah la enkawl zel a ni a, khawl leh hmanraw dang erawh a mamawh tawh lova, ICU-a enkawl a la nih chhan hi a enkawlna hmun ngai a nih avanga a awlsam zawk vang chauh a ni tawh a ni.
Health Department hotute chuan, Mizorama Covid 19 vei awmchhun sample endikna atanga hri laka a fihlim thu hi Sorkar laipui hotute hnenah thlen a ni tawh tih an sawi a. Chutihrual chuan, damlo hi a taksa a la chak tawk loh avang leh damdawiin chhuahsan nghal thei a la nih rih loh avangin enkawl lai anga ngaih tur a la nih hmel tih an sawi.
Covid 19 vei enkawl kawnga Doctor, Nurse leh thawktu dangte inpekna hi a chhuanawm hle a, a bikin ICU chhunga damlo enkawltute phei chu March ni 23-a Covid 19 vei an enkawl tan atanga vawiin thleng hian anmahni in-ah pawh an la haw thei lo a, Damdawiin hi riah chilhin ei leh in zawng zawng pawh damdawiin ah an buatsaih vek a ni.
