Tripura sorkar, Mizoram sorkar, Bru aiawh leh sorkar laipui aiawhten New Delhi-a inremna an ziahfel hnu lawkah Pu Rama hian history pawimawh tak siam a ni ta tih twitter ah a ziak a, inremna a awm theihna tura theihtawp chhuaha hmalatute chungah lawmthu a sawi a ni.
Tripura Camp hrang hrang paruk-a Bru awmte hi Mizorama hruaikir tuma hmalakna vawi tam tak a hlawh chham hnuah Tripura-a an awm hlen theihna tur hian nizan khan New Delhi ah sorkar laipui, Mizoram leh Tripura sorkar aiawh leh Bru pawl hrang hrang aiawhten inremna thuthlung an ziak a ni.
Inremnaah hian Ministry of Home Affairs Joint Secretary, hmarchhak bial viltuSatyendra Garh, Mizoram Chief Secretary Pu L Chuaungo leh Tripura Chief Secretary Manoj Kumar ten hming an ziak a, Bru aiawhin Mizoram Bru Displaced Peoples’ Forum (MBDPF) president Pu A Sawibunga, Mizoram Bru Displaced Peoples’ Coordination Committee (MBDPCC) President Pu A Laldingliana, Mizoram Bru Indigenous Democratic Movement (MBIDM) General Secretary Pu Philip Apeto, Bru Tribal Development Society (BTDS) President Pu Vipin Kumar Reang, Bru Displaced Welfare Organisation (BDWO) President Pu C Thankima leh The Indigenous Progressive Regional Alliance (TIPRA) Chairman Pu Pradyut Kishore Debbarma ten an hming an ziah hnan a, Union Home Minister Pu Amit Shah, Mizoram Chief Minister Pu Zoramthanga leh Tripura Chief Minister Pu Biplab Kumar Deb te chu hriatpuituah an \ang a ni.
Inremna ang hian November ni 30, 2019 hnu lama Relief Camp a la awm mekte chu an duhthlanna in Tripura ah an cheng hlen thei dawn a, hetihrual hian kum 2018 July ni 3-a inremna lo siam tawh anga Mizorama let duhte tan pawh hun la hawn chhunzawm zel a ni bawk ang.
Tripura sorkar chuan Camp hrang hrang paruka cheng mekte hi inremna ziah a\anga ni 15 chhungin a endik ang a, thla hnih chhungin an inbenbelna tur ram enfel tur a ni a, thla 5 chhungin chhungkaw tin an chenna tur ram pek fel tur a ni a, thla 6 chhungin an awmna tur hi luahlutin camp hrang hrang 6 pawh khar nghal tur a ni.
Bru te tan hian chhawmdawlna \ha tawk tak ruahman a ni a, chhungkaw tinin cheng nuai 4 an dawng ang a. In sakna tur ram feet 30’ feet 40’ a zau pek vek an ni ang a, in sak tanpuina cheng nuai khat sing nga \heuh chhungkaw tin pek an ni ang.
Heng bakah hian kum hnih chhung chu chhungkaw tinte hi cheng 5000 theuh thla tin tangkafaiin \anpui an ni dawn a, a thlawnin ration an dawng bawk dawn a ni. Tripura sawrkar chu Bru te ham\hatna tur ruahmanna siam tur leh electoral roll-a an hming thun sak thuai tura beisei a ni bawk.
Tripura Camp hrang hrangah hian Bru chhungkaw sang 4 chuangah mihring sing 2 sang 7 chuang an awm mek a ni.
