Election Commission Team Deputy Election Commissioner, Mizoram bialtu Pu Sudip Jain-a kaihhruai hian nizan khan Secretariat Conference Hall-ah Joint NGO Coordination Committee hruaitute an kawm a, an inkawmnaah hian Election Commission Team chuan Mizoram CEO Pu SB Shashank chu sawn tum a nih thu an hrilh a, Tripura Transit Camp-a Bru awmte Mizoram pawnah vote thlak tir an ni dawn lo tih NGO Coordination Committee hruaitute chu an hrilh bawk.
ZONET zawhna chhangin NGO Coordination Committee Chairman, Pu Vanlalruata, Central YMA President ni bawk chuan ECI Team nen hian boruak \ha tak hnuaiah darkar 1 chuang an thil ngaihpawimawh te an sawiho niin a sawi a ni. Hemi hnua thuthar lakhawmtute zawhna chhangin Joint NGO Coordination Committee Chairman Pu Vanlalruata chuan, Mizoram chief election officcer SB Shashank chu Mizoram atanga sawn chhuah a nih tur thu ECI team ten an tiam niin a sawi a, Tripura Bru Relief Camp-a Mizoram mi Bru awmte chu an camp-ah vote thlak tir an remtih tawh loh thu an thlen pawh ECI team hian an pawm niin a sawi bawk.
Pu Vanlalruata chuan, Kolasib Bawrhsap, District Election Officer ni bawk kaihhruaina hnuaiah Tripura Bru Camp-a awmte tunhnaiah Electoral Roll-a thun belh an ni leh hemi chungchanga tlawmngai pawlte lungawiloh dan pawh ECI team hi an hrilh niin a sawi.
Pu Vanlalruata chuan, Home Secretary sawn chhuah tak Pu Lalnunmawia Chuaungo chungchangah Mizo mipuite duhdan ECI hotute an hrilh nawn leh tih a sawi a, a rang lama Mizorama dah let turin an ngen tih a sawi bawk.
Mizoram CEO sawn rawtna chungchangah hian thu dawn chi hnih a awm a, pakhat chuan ECI Team Mizoram tlawhtuten New Delhi an thlen hunah hemi chungchang hi ngaihtuah a ni chauh dawn niin a tarlang a, hetihlai hian The Week chanchinbu ve thung chuan Election Commission hian CEO thlakna tur hming rawtna siam turin Mizoram Chief Secretary hriattirna a pe niin a sawi ve thung a ni.
