Zonet zawhna chhangin MNF President, Pu Zoramthanga, an party Nomination Committee Chairman ni bawk chuan he thu hi vawiin khan a sawia, MNF Party hi an President boral tawh Pu Laldenga hovin kum 1961 October ni 22 khan din a nia, he mi nia an party din champha lawmna ninghal turin tun\um inthlanna neih tur an Party Candidate turte chu hemi ni hian puan a ni dawn a ni.
He tih lai hian MNF party candidate turte hi an chiang deuh vek tawh a, Party hruaitu ten an Party Block Conference leh inkhawm dangah an lo puan tawh bakah bial tina an candidate turten campaign an beihpui an thlak deuh vek tawh thung.
An President Pu Zoramthanga chu Aizawl East-I bialah a ding dawn a, Congress Candidate Pu K Vanlalrawna leh ZPM Candidate Pu K Sapdanga te nen an inkhing dawn a, an Party Senior Vice President Pu Tawnluia chu Tuichang bialah dingin, Congress Candidate Pu James Thanghmingmawia leh ZPM Candidate Pu W Chhuanawma te nen an inkhing dawn a ni.
MNF Party Vice President Dr. R Lalthangliana chu South Tuipui bialah a ding dawn tih a chiang tawh bawk a, he bialah hian bialtu MLA nilai Congress Candidate Pu John Siamkunga leh ZPM lam candidate Pu Phairothanga te nen an inkhing dawn a ni.
MNF Vice President dang Pu R Tlanghmingthanga chuan tun \um inthlanah hian a chuh dawn lo tih a lo puang chiang tawh a, Party Treasurer Pu Vanlalzawma chu a bial ngai, Aizawl West-III ah a ding leh dawn a, he bialah hian Congress chuan Dr. CT Tuanga an dintir dawn a, ZPM lamin Pu Zaithanzama an dintir dawn nia hriat a ni bawk.
