Independence Day champha vawi 70-na, Mizoram hmun hrang hranga lawmna chu sorkar mi pawimawhten an hmanpui a,
Lungleiah chuan Independence Day hi Thuamluaia Mualah hman a ni a, School Education Minister, Pu H. Rohluna’n Hnam Puanzar pawt pharhin parade contingent 25 lam a endik a, an chibai a chhang let bawk. Minister chuan India ramin zalenna a neih hnuah hmasawn zelin, khawvel sorkar ropuite zingah a tel ve phak ta niin a sawi a. Remna leh Muanna boruak tha vawn him chu Mizoram sorkar ngaih pawimawh a nih thu sawiin, boruak tha leh ralmuang vawng him zel turin mipuite a fuih a ni. Hmasawnna hnathawh dan sawiin Minister chuan NLUP hmanga kut hnathawktu chhungkaw tam tak tanpui an nih hnuah Mizoram buh thar chhuah chu za zela 31.54-in a pung niin a sawi a, NLUP chhunzawmna tur, New Economic Development Policy hnuaia tun sorkar kum chhunga hman atan cheng vaibelchhe 750 dah a ni tih a sawi bawk. Pu H Rohluna chuan kumina ruahtui tla tamin hmasawnna hnathawh hrang hrang a tihbuai dante, Lunglei -Tlabung kawng leh Chhumkhum – Chawngte kawng siam that mek a nih dan te,Tawipui North leh Mualcheng South inkar kawng siam zawh tawh a nih thu te, Darzo kaia Chhimtuipui lei dawh chu tangkai taka hman a nih thute a sawi bawk.
Siaha District khelmuala he ni lawmna inkhawmah Finance Minister, Pu Lalsawta’n hnam puanzar pawt pharhin parade chibai a chhang let a, mipuite hnena thuchah sawiin, mi retheite khai chhuahna atana duan, NLUP thawh khatna leh thawh hnihna zawh fel a nih hnuah tunah hian thawh thumna leh thawh lina chhunzawm a, nakkumah zawh fel beisei a ni a ti a, huam zau taka hmasawnna hna thawh zui nan New Economic Development Policy siama hnathawh mek niin a sawi bawk. Independence Day lawmna inkhawmah hian khuallian hovin mipuite chu kum 2022-a India thar siam turin an intiam a ni.
Champhaia he ni lawmna inkhawm, Chhangphut Field-a neihah Social Welfare Minister, Pu PC Lalthanliana’n hnam puanzar pawt pharhin parade contingent 25 te chibai a chhang let a, zalenna atana beitute hnathawh ropui tak hre reng tura mipuite ngenin, an duh dan leh hmachhawp tihlawhtling turin lungrual taka tan lak a ngai niin a sawi a ni. Minister chuan, Seling-Champhai kawng, kum 2014-a National Highway atana puan tawh siam hna chu kum March ni 31 khan Mizoram PWD kutah hlan a nih thu te, he kawng siam thatna tur sum hi sorkar laipui atanga hmuh a nih tawh thute a sawi a ni.
Kolasib Tumpui Field-a he ni lawmna inkhawmah Health Minister, Pu Lal Thanzara’n hnam puanzar pawt pharhin parade contingent 18 lam a endik a, Mizoram sorkarin NLUP hmanga mi retheite khai chhuah a tumna chu a hlawhtling thawkhat hle nia sawiin, Serthlum, Kuhva leh Thelret chingtute pawhin kum rei lote chhungin a hlawhtlinna an hmu dawn niin a sawi. Minister chuan, huam zau taka Mizoram tihhmasawnna tura sorkarin NEDP a duanah kumin sorkar kum chhung hian cheng vaibelchhe 750 hman tura ruahman niin a sawi a, inkalpawhna kawng siamna leh kawlphetha siam chhuahna kawnga sorkar hnathawh dan a sawi bawk. Health Minister chuan Mizoramin Medical College puitling a neih theih nan Falkawna State Referral Hospital chu Mizoram Institute of Medical Education & Research atan buatsaih mek niin a sawi a ni.
Serchhip-a Khawtetlanga Independence Day lawmna inkhawmah UD&PA Minister, Pu Zodintluanga’n hnam puanzar a pawt pharh a, Parade contingent 15 te chibai a chhang let bawk. Minister chuan India ramin zalenna a hmuh a zarah hmun hrang hrangah hmasawnna a thleng a, Serchhip District-ah pawh hmasawnna hmel thar, tun hnaiah a awm tih sawiin, chung zingah chuan Chhingchhip-a Sainik School-te, Eklavya School te, Thenzawl-a Girls Hostel leh Integrated AYUSH Hospital thar te, Serchhip Tourist Lodge thar te, Boxing Hall te, DAO leh ATMA Building tharte, District Research Office Building tharte Serchhip-a Auditorium changkang tak, tun hnaia hawn takte a sawi tel a ni.
Mamit-ah chuan GSA Playground-a he ni lawmna inkhawmah Food Civil Supplies & Consumer Affairs Minister, Pu John Rotluangliana’n hnam puanzar pawt pharhin Parade contingent 19 te chibai a chhang let a, zalenna sualtuten an sual chhuah zalenna chu humhim tura tan la zui zel turin mipuite a ngen a. Zalenna neih hnuah Mizoram pawhin nasa takin hma a sawn thu leh Mizoram chu state ralmuang ber a ni thei chu lawmawm a tih thu a sawi bawk. Minister chuan NLUP hmanga Mizoram chhungkaw tam tak, dinhmun tha zawka hlan kai an ni chu lawmawm a tih thu a sawi a, Mamit District-ah Horticulture leh Agriculture Dept. hnuaia kut hnathawktute hamthatna atana kawng hrang hranga hnathawh dan a tarlang bawk. Pu John Rotluangliana hian Mamit District Jail, Observation Home leh Mamit District Hospital-te tlawhin, heng hmuna awmte chu thilpek a hlan bawk a ni.
Lawngtlaia Independence Day lawmna, CYLA Playground-a neihah Parl. Secretary, Pu TT Zothansanga’n hnam puanzar pawt pharhin parade contingent 27 te chibai a chhang let a, sorkarin NLUP hmanga kuthnathawktute hnathawh tur ngelnghet a siamsak avangin thingtlang lo neih za zela 40-in a tlahniam a, thil thar chhuah pawh za zela 53-in a pung chho niin a sawi a ni. Lawngtlai District Hospital-a thawk turin sorkarin doctor pathum a dah belh thu te, NEDP atanga endoscope leh ultrasound khawl thar lei a nih thu te pawh Minister chuan a sawi a, Khuallian thusawi zawh hian Dist. Bawrhsap, Dr A. Muthamma chuan mipuite chu India ram thar din turin thu a tiamtir a ni.
Independence Day Celebration Committee hruaitute chuan vawiin vek khan Lawngtlaia damdawi in pathum, District Hospital, Lairam Christian Medical Centre leh Christian Hospital bakah, Lairam Motherless Home leh District Jail te tlawhin tanpuina Rs 2,000/- theuh an pe a ni.
Tlabung-a Thangliana Muala lawmna inkhawmah Assembly Speaker, Pu Hiphei-a’n Hnam puanzar pawt pharhin Parade Contingent 10-te chibai a chhang let a, zalenna sualtute avanga India ramin British awp behna atanga zalenna a hmuh hnuah India chu mipui rorelna hmanga mahni-a ro inrel ram a ni ta a, chak takin hma a sawn niin a sawi a, ram pum hmasawn dan chu za zela 7.6 a nih laiin Mizoram hmasawnna chu za zelah 9.18 a tling niin a sawi. Tun hnaia tuilian avanga Tlabung leh a chhehvel mipuiten nasa taka an tuar chu pawi a tih thu a sawi a, Speaker hian vawiin vek khan Tlabung damdawi in leh Phar Damdawi in tlawhin thilpek a hlan a ni. Minister hi Pu Nihar Kanti Chakma, MLA in a tawiawm a ni.
Kawnpuia Indepdendence Day lawmna chu Parl. Secretary, Pu K.S. Thanga’n a hmanpui a, Pu PC Zoram Sangliana MLA-in Bairabi-ah a hmanpui a, Pu Lalrinliana Sailo MLA-in Vairengte-ah a hmanpui bawk a ni.
Khawzawla Mualvawm Field-a Independence Day lawmnaah Pi Vanlalawmpuii Chawngthu MLA-in hnam puanzar pawt pharhin parade chibai a chhang let a, mipuite hnena thuchah a sawi bawk.
Ngopa-a he ni lawmna inkhawmah Pu RL Pianmawia, MLA-in hnam puanzar pawt pharhin parade contingent 11 te chibai a chhang let a, hmasawnna tura sorkar hnathawh leh hmachhawp te a sawi a ni.
Gauhati High Court, Aizawl Bench-ah pawh Independence Day hi tukin khan lawm a ni a, Justice MR Pathak-a’n hnam puanzar pawt pharhin CRPF contingent -te chibai a chhang let a ni. He inkhawmah hian Gauhati High Court Registrar, Pu Guite, officer dang leh thawktu dangte an tel a, Govt. Complex-a Mizo Cultural Club-in hnam lam leh lemchan an entir a ni.
Thenzawla he ni lawmna inkhawm, Lothazawla neihah Parl. Secretary, Pu Joseph Lalhimpuia’n hnam puanzar pawt pharhin Parade chibai a chhang let a, NLUP thawh thumna leh thawh lina hnuaia kut hnathawktute tanpui mek chu nakkum March thlaa zawh fel a nih hunah chuan NLUP hlawhtlin dan chu chiang zawkin a lang chhuak dawn tawh niin a sawi. Pu Joseph Lalhimpuia chuan sorkarin a ngaih pawimawh ber zingah zirna siam that a tel avangin zirna in sak that te, zirtirtute chenna quarters sakte leh school chei that thlengin bawhzui mek niin a sawi.
