Session a tihtawp hmaa thusawiin Pu Lalrinliana Sailo chuan he session-ah hian Protem Speaker atana ruat Pu Lalrinawma’n member te rinawmna thu tiam tira a lakluh thu te, Speaker thlanna neihah chuhtu awm lova amah thlan a nih thu te, session ni hnihna-ah Larsap-in House-a thu a sawi thu te leh ni thumna-ah member hlui thi pahnih leh Prime Minister thi sun a nih thu te, Deputy Speaker atan chuhtu awm lova Pu Lalrinawma thlan a ni tih te a tarlang a, Speaker hna a thawhna turah amah \awiawma fin chhuah \hin turin Pu Lalrinliana Sailo chuan member te a ngen a, Mizote hunpui, Krismas leh kumthar lo thleng tur hlim taka hmang turin member te duhsakna a hlan bawk.
Vawiin session-ah Larsap, Kummanam Rajasekharan-a’n nimina House-a thu a sawi chungchanga lawmthusawina motion Lunglei North bialtu Dr. Vanlal\anpuia putluh chu rei tak sawiho a nih hnu-ah lungrual taka pawm a ni. He sawihonaah hian rorellai pawl leh opposition lam a\angin member \hahnem takin thu an sawi a, rorellai pawl lam leh opposition member \hahnem takin \ha tia a pumpuia an thlawp laiin, opposition ZPM Group Leader, Pu Lalduhoma chuan Larsap thusawi hi sorkar thar ngaihpawimawh leh hmalakna tur tarlanna a ni tih sawiin, a duh khawp loh thu a sawi a, a ngaihpawimawh Larsap thusawia telh ve loh zingah chuan ramri buai chingfel tura hmalakna tumna te, ram dang mi Mizoram lo lut nawr chhuak tura hmalak tumna te, kuthnathawktute thlai thar leisak tumna te a lang lo niin a sawi a, Mizoram hmasawn dan tarlanna, Statistics chu pawm tlak loh nia a hriat thu te, sorkar tharin statistic dik hmangin bul \an se tih te, sorkar hnathawkte, Political Party hruaitute leh Party worker ten hnathawk hlei thei lovin zar buai lo se a duh thu leh corruption do tura Lok Ayokta din tur chu Chief Minister pawh hrem thei tura thuneihna nei ni se a duh thu a sawi a ni. Sawihona tlang kawma thu sawiin House Leader, Pu Zoramthanga chuan Larsap thusawiah hian sorkar Department 44-te hnathawh dan tur tarlan kim theih a ni lo tih te, a \hen a zar chauh tarlan a ni tih a sawi a, Larsap thusawia thil tarlan \henkhat chu sorkar hma thil tih fakna te pawh a ni tel niin a sawi a ni. Pu Zoramthanga chuan an sorkar tuk lawk a\anga hna an thawh \an thu te, an party, Kohhran leh tlawmngai pawlte duhdan angin sorkar chuan zu a khap nghal thu te a sawi a, zu zawrh chu Mizoram phurrit sutkianna tur niin a sawi bawk.
