Home Affairs Ministry ruahmannaa tun thla ni 20-a Mizoram leh Assam ramri chungchang inbiaknaa Mizoram aiawha tel tur Chief Secretary leh a thurualpui turte chu vawiin khan Chief Minister, Pu Lal Thanhawla’n thu pawimawh hrang hrang a sawipui. He inbiakna neih tura Mizoram aiawh turte hi an hnathawh tur a pawimawh tih hre tur leh rilru fim tak pu chunga Mizoram tan theihtawp chhuah turin a chah a ni. Assam nena inbiaknaa neih turah hian Chief Secretary, Pu Arvind Ray, Home Addl. Secretary, Pu Lalbiakzama leh OSD Home Pu David H. Lalthangliana ten Mizoram ai an awh dawn a ni. Vawiina an thuken tur sawi honaah hian inbiaknaa tel turte bakah Chief Minister Political Adviser, Pu Lalrinmawia Ralte, Chief Minister Office-a Principal Secretary, Pu Lalram Thanga, Principal Adviser, Pu RL. Rinawma leh Land Revenue & Settlement, Home Department leh Mizoram State Boundary Commission member-te an tel a. State pahnih Chief Secretary inbiak huna pharh tur Mizoram Sorkar lehkha pawimawh leh \anchhan turte a mal te te in uluk takin an zirchian chiang nawn a ni. Tun thla ni 8 leh ni 10-a MZP in Bairabi Zophai hmuna Zofate Chawlhbuk sak a tumna Assam Sorkar-in a dodal avanga harsatna thlengah Mizoram chuan a lungawi loh thu Union Home Minister, Pu Rajnath Singh-a hnenah ziakin a thlen a. Union Home Minister chuan ramri buaina chingfel turin State pahnih Chief Secretary ve ve chu tun thla ni 20 khian New Delhi-ah Union Home Secretary kaihhruainaa inbe turin a ti a ni.
