Damcherra-a coronavirus kai hmuh chhuah thar hi kum 32 mi, Madhya Pradesh lam mi a ni a, hemi hmalama Tripura in hri leng kai a lo neih tawh mi pakhat nen rel-ah an chuang dun tih Tripura Chief Minister Biplab Kumar Deb chuan nizan khan twitter ah a ziak a ni.
Tripura leh Mizoram inrina, Langkaih lui kama khaw hrang hrang, Zawlnuam, Bung\huam, Kanhmun leh Luimawi-a mi tlawmngaite chuan ngawrh leh zualin ramri hi an veng mek a, \hal lai a nih avangin Langkaih lui kam lai a ni a, duh duhna hmunah kai theih a nih avangin tlangval tlawmngai te chu leilet zawl leh lui kamah te riak lutin an duty a ni.
Langkaih Group YMA Secretary Pu Lalmuanpuia Jongte chuan Zonet zawhna chhangin khaw hrang hrangin Langkaih lui kamah hian riahbuk sualin, riak lutin ramri an veng mek tih a sawi a, mi tlawmngai duty te hi ni 2 leh zan hnih zelah an in thlak \hin tih a sawi a, hetiang hian hapta hnih chuang riak lutin an duty tawh a, tualchhunga mi tlawmngai leh neinung deuhten an eitur leina tur hi an thawkhawm \hin a, bialtu MLA te hnen a\ang pawhin \anpuina an dawng tih a sawi.
Tripura nena inkal pawhna, Kanhmun-Damcherra lei chu mipui kharkhipna thupek hman anih a\ang khan khar a lo ni tawh a, Assam nena inrina, Medeli lam pawh khar a lo ni tawh bawk. Mamit SP Pu Shashank Jaiswal chuan Zonet zawhna chhangin Tripura-ah coronavirus kai hmuh chhuah thar a awm avang hian a \ul angin sipai pawh ramri hnaihah an dah belh tih a sawi a, hmun 30 chuangah police te an indah bakah patrolling te pawh an nei \hin tih a sawi a, ramri chu khauh taka ven a ni a ti.
Hetihlai hian Kanhmun-a venhim hna thawktute hman tur hian hmanraw chi hrang hrang – hmai tuamna, kutkawr leh kut tihfaina ang chi te chu vawiin khan Aizawl a\anga thawnchhuah a ni tih sorkar thuchhuah chuan a sawi a. Heng hmanruate hi Kanhmun PHC Medical Officer hnena thleng turin Health Dept in a thawn a ni.
