Mizoram Merchant Association-in Mizorama Bazar India hawn a ni leh chu sumdawnna kawnga Mizoram chim ral theihna tur nia lang niin an sawi a, tha lo an tih thu leh tihtawp a nih theih nan thuneituten tan la se an duh thu an sawi. MIMA General Headquarters leh an hnuaia inziak lut pawl hrang hrangte chu Bazar India hawn chungchang ngaihtuahin nimin khan MIMA pisaah an thukhawm a, hemi hnua thuchhuah an siamah MIMA chuan, Mizoram sorkarin a tih theih loh thil ni lovah Mizorama hnam dang sumdawn theihna ILP kum 2 nung pe lo turin sorkar an lo ngen tawh tih an sawi a, tlawmngai pawl hrang hrang leh Political party hrang hrangte nen an inrawn khawm laia Bazar India hawn a ni chu an ngaih thiam loh thu an sawi. MIMA chuan, RTI hmanga an zawhna, Home Department-in a chhan danin, kum 2015 April leh kum 2017 April inkar chhungin Mizoram hnam dang sumdawn theihna ILP, kum 2 nung chu mimal 253 leh Company 187 hnenah pek niin an sawi a, hetih rual hian Big Bazar leh Bazar India chu pek an nih loh thu an hrilh niin an sawi. MIMA chuan, Chaltlanga Bazar India dawr hawnna Building neitu, Minister hlui, Pu Biakchungnunga pawh a inah tum 2 lenchilhin Mizo-te tan a him lohzia sawipui a nih hnuah lehkha pawh pek a nih thu an sawi a, hei bakah Phone atanga biak a nih thu sawiin, heti chunga an ngenna ngai pawimawh lova Bazar India a luahtir ta tho chu an ngaih thiam loh thu an sawi. MIMA chuan, Mizoram Taxation Deptt. leh Central Excise and Direct Tax Deptt. te chu hnam dang GST Registration dil, kum 2 ILP nung nei lote hnenah phalna pe lo tura an duh thu an sawi a, Internet hmanga GST Registration tite chu Mizoram Assembly-in a lo pawm tawh angin ILP kum 2 nung nei lote chu paih ngam tura sorkar an phut thu an sawi a, Mizo-te chu hnam dangin an chim ral loh nan theihtawpa tan an lak zel tur thu an sawi bawk.
