Mizoram Police IGP Pu LH Shanliana hovin, DIG Northern Range Pu Lalbiakthanga Khiangte leh Aizawl SP Pu C Lalruaia ten vawiina chanchinbumite Aizawla an kawmnaah ramri venhim dan hi zawhna chhangin an sawi a. Ramdang leh state dang nena inkalpawh theihna 48 a awm thu an sawi a, heng zinga 35 chu ram dang, Myanmar leh Bangladesh nena inkalpawhna a ni a, heng zingah hian Myanmar nena inkal pawhna Zokhawthar leh Bangladesh lamah Kawrpuichhuah te chauh chu hunbi neia hawn a ni tih an sawi a, a bak zawng chu khar vek a nih thu leh police duty pawh a \ul chin an dah tawh tih an sawi.
Myanmar nena inkalpawhna Zokhawthar leh Bangladesh nena inrina Kawrpuichhuah te hi zing dar 9 leh tlai dar 5 inkar hawn a ni. Tripura nena inkal pawhna Kanhmun leh Manipur nena inkal pawhna Khawkawn te pawh zing dar 9:00 atanga tlai dar 5:00 thleng hawn a ni bawk a. Assam nena inkal pawhna Bairabi leh Vairengte-a Check Gate te chu hun rei deuh zawk zing dar 6:00 atanga zan dar 10:00 thleng hawn turin a tirah rel nimahse, mihring chevel an tam avangin darkar 24 hawn a ni leh ta zawk a. Hengah te hian Damdawi lam thiamte leh police ten veivakte dinhmun an enfiah \hin a ni.
Police hotute hian Covid-19 leng mek chungchanga mipui ti chiai zawnga thu dik lo social media hmanga vawrhdarh an awm \hin chu dan bawhchhiatna a nih thu an sawi a, heng mi te hi awlsam taka chhui chhuah mai theih an ni tih sawiin, thubuai siamsak zel an tum tih an sawi.
