Vawiina Aizawl Press Club-a chanchinbumite a kawmnaah Youth Commission Chairman hlui Pu Joseph Lalhimpuia hian Mizoram Teacher Eligibility Test MTET paltlang lo zirtirtu 946 muster roll-a lak sorkarin a tum chu Right to Education Act in a phut leh Recruitment Rules awmsa kalh a ni tih a sawi a, hei hi an duhsak zawng lak tumna leh party mi te duhsak tumna anih avangin Congress party chuan a dodal a ni a ti.
RTE Act 2009 hman a nih hnuah Primary leh Middle School zirtirtu lak thar tur reng rengin TET an paltlang ngei tur a ni tih Pu Joseph Lalhimpuia hian a sawi a, Parliament Dan siam zulzui hian National Council for Teacher Education NCTE chuan kum 2010 August ni 23 ah hriattirna ti chhuakin TET kalpui dan tur hi a siam a, Education chu concurrent list a nih avangin Central leh State in TET hi an duang a, Mizoramah pawh kum 2013 a\ang khan Mizoram Teacher Eligibility Test MTET chu hman a ni a, heng te hi Mizoram sorkar chuan palzut a tum a ni a ti.
Kum 2013 a\anga MTET buatsaih anih hnuah MTET paltlang thlap, zirtirtu atana dan ang taka lak theih mi 4109 an awm tawh tih Pu Jopseph Lalhimpuia hian a sawi a, heng zinga 2262 chu Primary school zirtirtu atan leh 1847 chu Middle school zirtirtu ni tura MTET paltlang an ni a, zirtirtu ni tura MTET paltlang hi an tam tawk a, MTET chu thil dang atana hmanna tur awm lo, zirtirtu nihna atan chauha pawimawh a nih avangin MTET paltlang tam tawk an awm laia a paltlang lo zirtirtua lak tum chu Dan bawhchhiatna a nih bakah thil kalphung a ni lo a ni a ti.
Tun thla ni 2 khan DP&AR chuan zirtirtu 946 te MR-a la thei tura recuirtment rules awmlai hman rih loh, one time relaxation dilna chu MPSC ah a thlen tih Pu Joseph Lalhimpuia hian a sawi bawk a, he rawtna hi party mite duhsak tumna mai a ni tih hre chung leh India ram puma dan hman lai mekte hre reng chungin MPSC chuan thutlukna dik a siam an beisei tih a sawi.
Zirtirtu 946 MR-a la tura sorkarin chhuanlama a hman thingtlanga zirtirtu indaih loh vang tih chu chhuanlam a tling lo tih Pu Joseph Lalhimpuia hian a sawi a, tunhnaia MPSC kaltlanga Primary school zirtiru 93 lak zinga 18 chu Aizawl khawpui zirtirtu indaih tawh sana hmunah dah an ni a, hetiang bawk hian zirtirtu indaih tawh sa na District khawpuiah 25 dah an ni bawk a ni a ti a, Middle school zirtirtu atana lakthar 58 zinga 9 pawh district khawpuiah tho dah an ni a ti.
