Vawiina Aizawl Press Club-a thuthar lakhawmtute an kawmnaah MPCC hruaitute chuan, Hachhek bialtu MLA, Pu Lalrindika Ralte-in a zawhna Finance Department-in tun thla ni 7-a a chhannaah Covid 19 do nana sum hman tawh zawng zawng chu avaiin cheng vbch. 43 a ni a. Heng zinga State sorkar sum chu cheng vbch. 9 leh nuai 7 a ni a, Central sum cheng vbch. 33 a ni thung a, chuvangin Covid 19 vanga sum senso hautak lutuk leh chhiat vek phahna tur khawp anga an sawi chu thil ni thei a ni lo tih an sawi a. Tunah hian Cpovid 19 do nana Chief Ministers Reloef Fund-a sum lut tawh chu cheng vbch. 20 vel a ni a, heta tang hian cheng vbch. 10 vel hman loh a la awm mek tih sawiin, Congress hruaitute chuan, Mizoram sorkar hian Sum a lalut reng a, kumin April leh May thla chhunga Tax leh Non tax atanga sum lakluh chu nikum April leh May thlaa hmuh aiin a tam zawk a. Central Sorkar atangin sum pawh an hmu tha a, CM sawi danin 2020-21 Budget pawh hman ala ni mang lova, CSS do letna tur cheng vbch. 200 leh PAHOSS atana cheng vbch. 10 dah pawh hman ala ni loh avangin sorkar hi sum leh paiah harsa viau tur niin a lang lova, Covid 19 do nana sum senso hautak zual tur pawh a awm tawh lo nia alan bawk si avangin June atanga August chhunga sorkar hnathawk hlawh puk tur cheng vbch. 90 chu eng atana hman tur nge tih leh eng Account nge dah a ni tih sawifiah turin Sorkar an phut a ni.
MPCC hruaitute chuaan, vawiin thlenga CM relief Fund-a cheng vbch. 20 vel tawh bakah MLA 35-in LAD fund an thawh turah mi 2 chiahin an la pe kim a, la lut tur hi cheng vbch. 8 zet a la awm bawk avangin Covid do nan Sorkar-in sum a ngah hle ang pawn a sawi theih a ni, an ti a. Covid 19 hri leng vanga mipuiten harsatna hrang hrang tawk a, eizawnna chan mi tam tak an awm lai leh Sorkar hnathawk hlawh puk sak a nih hial lai hi chuan mipui dinhmun dawmkanna tur ni lem lo leh hna hmanhmawh thlak ni lem lo infiamna lam thil ang chi chu chawlh san rih turin Sorkar an phut a ni.
