All India Congress Committee-in ruahmanna a siamin MPCC hian petrol leh diesel man sang zel tihniam tura ngenna hi an thlen a, lehkha an thehluh-ah hian India ramin sum leh paia harsatna nasa tak a tawh chhoh mek laiin sorkar laipui-a BJP kaihhruai chuan Petrol leh Diesel man nasa takin a tisang chho zel tih an tarlang a. Hei hian mipui a nghawng na hle a ni an ti.
Kum 2014-a BJP-in sorkar a siam tan tirh khan Petrol litre khat zelah chhiah Rs. 9.20 leh Diesel litre khat zelah Rs. 3.46 lak a ni a, BJP sorkar hian Petrol leh Diesel man hi tisang chho zelin kum 6 a liam meuh chuan chhiah hi petrol lirtre khatah Rs. 23.78 leh Diesel-ah Rs. 28.73 lak a ni tawh a ni, an ti a. Chhiah punna hi Diesel-ah zaa 820 leh Petrol-ah zaa 258 zet a tling tawh a ni an ti a, COVID-19 avanga khawvel puma oil thlit fim loh man nasa taka a tlahniam chungin BJP sorkar chuan Petrol leh Diesel man tihhniam a tum chuang lo niin an sawi.
MPCC hian, khawvel pumah oil thlit fim loh man nasa taka a tlahniam chunga BJP kaihhruai sorkar laipuiin Petrol leh Diesel man a tisang lui zel hi mipui rawkna dik tak a ni, an ti a, Mizoramah pawh BJP-in NDA huanga an thawhpui MNF an sorkar avangin thil man sang vanga harsatna mipuiuten an tawk nasa hle niin an sawi.
Thla 3 chuang zet Covid 19 hri leng vanga inkharkhip a nih chhungin mipui sum lakluh nasa takin a tlahniam a, thil man erawh nasa takin a sang thung tih MPCC hian an sawi a. Sa man phei chu a sang nasa a, mipuiin harsatna an tawk mek tih an sawi a. Hetiang a nih mek lai hian MNF kaihhruai Mizoram sorkar chuan thil man sang thunun turin hma a la lova, mipuiin an tuar mek a ni an ti a, task force thenkhat erawh chuan an huam chhunga thil man sang lutuk tur an thunun thei a. Hei hian MNF sorkar chak loh zia a tarlang a ni, an ti.
