Kum 2019-2022 chhunga MPCC President chu Pu Lal Thanhawla a ni leh dawn a, Treasurer nilai Pu H Liansailova chu Vice President ah chhovin, Treasurer ah Pu Zodintluanga a lut chho thung dawn a ni. Heng office bearers tur pathumte hian MPCC Election Chiarman Pu Albert Lalthlamuana hnenah an hming an pelut nghal a, nomination thehluh theih hun tawp vawiin tlai thleng khan hming pelut dang an awm loh avangin office bearers post pathumte hi thlan a ngai dawn ta lo a ni.
MPCC inthlang tur hian ngaihven a hlawh hle a, an vice president ni \hin Pu R Lalzirliana chu nikum lamah party danga a luh avangin, vice president tura rinkai hming pali vel lang zingah Pu PC Zoramsangliana, Pu Lalsawta, Pu John Rotluangliana leh Pu Zodintluanga te pawh an tel a ni.
Hetihlai hian MPCC OB meeting chuan an party kaihruai zel turin Pu Lal Thanhlawla an rintawk thu an lo pass tawh a, hemi piah lamah Pu Lal Thanhawla chu Party President ni chhunzawm tur leh Vice President leh Treasurer pawh a thuneihnaa ruat an lo phalsak tawh a, MPCC OB meeting thu ang hian Pu Lal Thanhawla hian Vice President atan Pu H Liansailova leh Treasurer atan Pu Zodintluanga MLA te hi a ruat a, hei hi vawiina Aizawla \hukhawm MPCC Extended meeting hian a pawmpui a ni.
Hetianga Office bearer tur te chuh ngai lova tih chian a nih takah hian tun thla ni 24-a MPCC hruaitu thar thlanna neih turah chuan Executive Member tur mipa 50 leh Hmeichhia 10 an vaiin mi 60 thlan chhuah an ni dawn a, MPCC Executive Member tur hian hming pelut 91 an awm a ni.
