Zawhna chhangin Higher and Technical Education Department, Technical Wing hotute chuan, tun hnaiah Supreme Court-in Technical Course hrang hrang zir tur thlan danah thutlukna thar siam mah se, Mizoram Sorkar-a Cabinet-in ti tura a tih ang ang an zawm mai dawn tih an sawi. Technical Wing hotute chuan, damdawi lam zirnaah Mizoramin ama puala Medical College a neih tawh avangin dan ang chuan Central Pool chu chang thei tawh lo tur ni mah se, Ministry lamah Mizoram tan seat pe tura dil a ni a, hei hi a pek hun ala nih loh avangin an chang dawn nge dawn lo hriat theih ala ni lo tih an sawi a, State dang Medical College neite pawhin kum tin quota an hmuh \hin tho avangin Mizoram pawhin seat engemawzat a chan beisei a ni tih an sawi.
Nikum khan Central Pool-ah Mizoramin MBBS Seat 18 leh BDS Seat 7 a chang a, NEC hnuaiah MBBS seat 14 leh BDS Seat 7 a chang bawk a, kumina NEC hnuaia Mizoram Seat chan tur hi hriat tawh a ni a, MBBS seat 12 leh BDS Seat 7 a ni. MBBS bikah nikum aia kumin seat hmuh zat 2-a a tlem chhan chu Mizoramin Medical College a neih tawh vanga Assam-in seat a pek duh tawh loh vang a ni.
Technical Wing hotute chuan, NEC hnuaia MBBS leh BDS zir turte tan Allotment pek theih thuai beisei a ni tih an sawi a. Tun maiah a hun sawi lawk theih ni lo mah se, a rei tawh dawn loh avangin zirlaite chu chanchin thar lamah thu lo ngaichang tura beisei a ni, an ti.
Mizoram Quota-a Technical Course hrang hrang zir tur thlanna dan Mizoram (Selection of Candidates for Higher Technical Courses) Rules chungchanga High Court thutlukna Mizoram Sorkar-in a khinna chu tun hnai khan Supreme Court-in a hnawl a, he dan hman tur chungchangah hian Supreme Order thar awm mah se, tun thla ni 8-a Councils of Minister \hukhawmin Mizoram quota-a technical Course zir tur thlanna danah Category-I dil thei ‘Indigenous people’ tih chu ‘Zo Ethnic’ bak Mizoramah ‘Indigenous people’ an awm loh avangin ‘Zo Ethnic’ pual atana dah a remtih chu ala danglam lova, sorkar chu a ngaihdanah nghet takin ala ding a, thuthar a awm dawn a nih chuan Councils of Minister \hukhawmin ala rel tur thu Higher and Technical Education Minister, Dr. R. Lalthangliana’n Zonet a lo hrilh tawh bawk a ni.
