Mizoram sorkar leh Hmar People Convention (Democratic)-in inremna zawnga inbiakna an neih mek chhunzawm leh hun tur a la hriat theih loh. Home Department hotute hnen atanga Zonet thudawn danin, inbiakna hnuhnung ber kumin April thlaa neihah khan inbiakna hi kumin June thla vela chhunzawm tura thu dah nimahsela, tihfel ngai tam tak a awm avangin chhunzawm leh hun tura beiseiah a chhunzawm theih loh a, tuna hmalakna hi a kaltluan chuan chhunzawm thuai tum a ni dawn niin Home Deptt. atanga thudawn a ni. Home Deptt. hotute hnen atanga thudawn danin he inbiakna neih mek hi a hlawhtlin theih nan HPC(D) pêng pakhat, Pu Lalhmingthanga Sanate kaihhruai pawh huam tura hmalak a ni tih a sawi a ni. He hmalakna chungchangah hian HPC(D) chuan tun thla ni 21 khan thuchhuah siamin, Mizorama Hmar-te buaina chingfel tura Mizoram sorkar nena inbiakna neih mekah sorkarin Pu Lalhmingthanga Sanate pawlte huam tura hma a la chu lawmawm an tih thu leh he inbiakna hi boruak tha tak hnuaia chhunzawm a, a hlawhtlin an beisei thu an sawi a ni.
