Mizoram sorkar leh HPC(D) ten inremna thuthlung nimina Aizawla an siam angin HPC Demand Area tia hriatah thuneihna sang zawk nei, member 14 awmna, Sinlung Hills Council din a ni dawn. Sinlung Hills Council hi Mizoram State Legislative Assembly dan thar siam tur anga din a ni ang a, a Headquarters-ah Sakawrdai emaw, a area huam chhunga khaw remchang dang emaw hman a ni ang a, chutah chuan an Secretariat dah a ni ang a, chu office chu Mizoram sorkar ruat Secretary-in a ho ang.
Sinlung Hills Council din tur hi Chief Executive Member-in a ho anga, Chairman leh Deputy Chairman pakhat ve ve, Executive Member pali, Member dang panga leh Nominated Member pahnih an awm ang. Sinlung Hills Council hian hmasawn nan leh mipuite enkawlna lama hna a thawh theih nan Mizoram sorkar chuan Sinlung Hills Council Budget siam zulzuiin an mamawh sum a pe ang a, Council hian sum hmanna tur Plan leh Scheme te a duang ang a, chu chu Mizoram sorkarin a pawmpui hnuah hlen chhuak turin hna a thawk dawn a ni. He Memorandum of Settlement siam tak ang hian HPC Demand Area tia hriatah remna leh muanna boruak \ha tak a awm theih nan HPC(D) chuan hel pawl an nih laia an dan hman sorkar dan kalh te chu ram dan kalh lo turin an siam \ha ang a, HPC(D) hel pawl mi zawng zawngte chuan kim takin an ralthuam neih chi hrang hrang leh silaimu te sorkara pe lutin helna leh tharum thawhna bansanin, nunphung pangngaiah an lo let ang a, an ralthuam thehluh chi hrang hrang atan rate siam angin sorkarin lawmman a pe dawn a ni. HPC(D) hel pawl mi nunphung pangngaia lo let te chu chhawmdawlna leh an inbengbelna tur sorkarin a pe ang a, tun hmalama hel pawl an nih laia pawi an khawih vanga thubuai an neih te pawh tih tawp sak a ni ang a, an pawi khawih vanga tuna lung ina tang mek te pawh an tan chhung hun tih tawi sak an ni ang. He inremna thuthlung nimina State Guest House-a siam takah hian Mizoram sorkar aiawhin Chief Secretary, Pu Arvind Ray leh HPC(D) aiawhin an Chairman, Pu H. Zosangbera ten an hming an ziak a, hetah hian Chief Minister Political Adviser, Pu Lalrinmawia Ralte, Home Secretary, Pu Lalrinliana Fanai, Additional Home Secretary, Pu Lalbiakzama leh officer dang engemawzat an tel a, HPC(D) lamah an Chairman, Pu H. Zosangbera bakah Co-Chairman, Pu LT Hmar, an thupuangtu Pu Lal\haliana leh hruaitu dangte an tel a ni. He Memorandum of Settlement siam tak hian kum 1994 July ni 27-a HPC leh Mizoram sorkar inkara inremna thuthlung lo siam tawh kha a luahlan ta a ni. Puan tawh angin HPC(D) hel pawl nunphung pangngaia an ralthuam nena lo let tur te hi tun thla ni 12, kar leh Ninganiah lawmluh an ni ang.
