Tangkhangte haw theih hun hi April ni 30 atanga May ni 2 thleng khan hawn a ni a, Vairengte-a Medical Team chhinchhiah dan chuan, May ni 4, 2020 thleng khan tangkhang lo haw mi 926 an awm a, heng mite hi Aizawl district-ah mi 420, Lawngtlai district ah mi 165, Siaha district ah mi 120, Lunglei district ah mi 108, Kolasib district ah mi 50, Champhai district ah mi 14, Serchhip district ah mi 34, Mamit district ah mi 6, Saitual district ah mi 5 leh Khawzawl district ah mi 4 te an ni.
Medical Team-te chuan Vairengte Screening point a sorkarin hnathawktu a dahte hi tun dinhmunah chuan an indaihtawk rih niin an sawi a, tangkhang lo haw turte endik tur hian ZMC atangin doctor 3 leh district Hospital Kolasib atangin Ayush doctor 1 leh Health deptt staff mi 10 dah an ni.
Zonet corr Lalnuntawma’n a kawmnaah Screening point a duty doctor-te leh police te hian, phai atanga lo hawte hi Vairengte ah hian chhinchhiah vek an ni a. Kolasib District pel tur an nih chuan motor number leh passenger zat te Kawnpui OC ah hriattir a ni a. Medical Team lamin Aizawla Covid-19 Control Room an hriattir bawk a, mimal tin endikna, Screening sheet an thawn vek bawk a ni.
Police-in list an thawnte hi Aizawl lama tlang tur chu Kawnpui OC in a lo endik leh a, Medical Team lamin control room-a an thawnte hi Aizawlah lo enfiah leh a ni bawk a. Mihring quarantine turte chu thuhruk leh kawng laka lak hran theih a nih an rin loh thu an sawi.
Hmarchhak biala tangkhang mekte hruai haw thawh khatna hi tihtawp rih a ni a, a thawh hnihna buatsaih leh tumin sorkarin hma a la mek a. Sorkarin ruahmanna felfai tak a siam hma chuan mahni thua tumah haw lo turin Home Dept chuan tangkhangte a hriattir a ni.
