Disaster Management changtu, Home Minister Pu Lalchamliana hova hrileng dona kawnga sum hman dan thlir hona-a tarlan a nih dan chuan, kum 2019-20 atana central sorkarin Mizoram sorkara SDRF a pek cheng nuai 2000 atang hian cheng nuai 500 chu Covid-19 sample collection leh screening bakah quarantine senso atana hman theih a ni a, nuai 200 chu bungraw mamawh zual leina atan hman phal a ni bawk.
Covid-19 dona atana hman theih cheng nuai 700 a\ang hian sample collection leh screening bakah quarantine senso atan cheng nuai 205 sing 1 leh bungraw mamawh leina tur cheng nuai 116 sing 1 sang 8, a vaiin cheng nuai 321 sing 2 sang 8 pek a ni tawh a.
District 11-a Disaster Management Authority te kutah sample collection leh screening bakah quarantine senso atan cheng nuai 208 sing 7 sang 5 leh hmanraw mamawh leina tur cheng nuai 1 sing 8 sang 3 a vaiin cheng nuai 210 sing 5 sang 8 pek tawh a ni.
Heti hian sample collection leh screening bakah quarantine senso-a hman tur sum cheng nuai 86 sing 1 sang 5 leh hmanraw mamawh leina tur cheng nuai 81 sing 9 sang 9, a vaiin cheng nuai 168 sing 1 sang 4 hman loh a la awm tihna a ni.
Pu Lalchamliana hova Disaster Management Dept hotute thukhawm hian Fur lo thleng tura Sorkar lo inrinlawk dan tur pawh an sawi ho a, DM&R department chuan State Disaster Management Authority leh District Disaster Management Authority te kal tlangin chhawmdawlna bakah hmanraw mamawhte a ngaihtuah mek tih sawilan a ni. District Disaster Management Authority hrang hrangte hnenah hian March ni 25 khan cheng nuai 500 pek chhuah a lo ni tawh a, District tinah harsatna lo thleng palh theiah rang taka mipuite chhawmdawl thei turin ruahmanna siam a ni tih sorkar thuchhuah chuan a sawi.
