Mizoram Teachers’ Federation hruaitute hi nimin khan an thukhawm a, Mizoram hmun hrang hranga damlote phurhna tur Ambulance indaih lohna phuhruk turin Ambulance hi 5 lei ni se, a rang thei ang berin sorkar hnenah hlan ni se an ti a. Hemi rual hian, Mizoram hmun hrang hranga ramri vengtu Village Level Task Force-te pawh tanpuina pek ni se an ti bawk.
Zonet news chuan, Covid 19 kaihhnawiha hman tur bik, Ambulance hranpa Mizoram-in a neih loh thu leh ambulance indaih loh dan hi a lo puang tawh a, tuna Mizoramin Ambulance a neih zawng zawng 69 zinga 10 chu hman tlak loh khawpin a chhe tawh a, heng Ambulance-te hi National Ambulance Service atanga dawn a ni a, tunah hian, Sorkar chu Covid 19 hri leng kaihhnawiha hman theih tur Ambulance 3 lei turin a inruahman mek bawk a ni.
