Mizorama fur zikhlum chingtu hlun Samthang khua zikhlum hmun chu vawiin khan Champhai Sub-Division Horticulture Officer, Pu Vanlalvuana Rokhum leh Samthang Circle Horticulture Officer Pu F Vanlalhruaia Rokhum chuan a hmunah tlawhin thlai chi an sem a, zikhlum chingtu, bawngin a tihchhiatsak chhungkaw 4-te hnenah fur zikhlum (Ryozeki) chi an pe nghal.

Champhai Sub-Division Horticulture Officer Pu Vanlalvuana Rokhum chuan Samthang ram chu thlai chi hrang hrang that duhna a nih rualin Samthang khuaa loneitu, hun rei tawh tak atanga hlawhtling taka fur zikhlum leh vaisamtawk lo ching tawhtute chu an taimakna avanga hlawhtling taka ching thei an ni a ti a. Department lam pawhin hmalakpui zel an inhuam tih a sawi. Hripui leng mek avangin thlai rah chi leh thlai hnah mai bakah chaw a rin theih chi pangbal, kawlbahra leh bal te chu an thlai chin nena indip buai lo zawnga ching uar turin lo neitute chu thu a rawn bawk.

Champhai Sub-Division Horticulture Office te hian nimin khan Farkawn leh Khankawna thlai hmun siamtu chhungkaw 84 hnenah thlai chi – changkha, bawkbawn, um-ei, behlawi lian chi leh hmarchapui chi an lo sem tawh a, vawiin khan Samthanga thlai chingtu chhungkaw 86 hnenah sem leh a ni.