Mizoram Merchant Association huaihawtin vawiin khan MZP Conference Hall-ah tlawmngai pawl leh Political Party hrang hrang aiawhten Mizorama sumdawnna khauh zawka khuahkhirh dan tur an sawi hova. He inrawnkhawmnaa telte chuan, danin a phut angin Mizorama hnam dang sumdawng, GST-a inziak lut turte chu kum 2 tal ILP an nei tur a ni tih chu dik taka kenkawh a nih theih nan sorkar-ah thlen ni se, chhiah lakna dan thar, GST hman hnua Mizorama dik lo taka bungrua lo lut \hin chu tihtawp a nih theih nan a endikna hmun siam ni se, phalna nei lo, hnam dang sumdawng endik tur leh Arunachal Pradesh-in Trading Regulation a hman anga Mizo hnam himna tur Trading Regulation Act siam a nih theih nan \an lak ni se an ti a. Hei hi chak zawka bawhzui a nih theih nan Central YMA kaihhruaina hnuaiah bawhzui ni se, hemi atan hian Central YMA-ah ngenna thlen ni se an ti a ni.
He sawi hona kaihruaitu MIMA President, Pu PC Laldinthara chuan, Mizoramah hnamdang sumdawng lian zawk an lo luh belh zel chu Mizo hnam tan him lo theia an hriat avangin he inrawn khawmna hi buatsaih a ni tih a sawi a. RTI hmanga an zawhna, Taxation Department-in a chhan danin, kumin September thla thleng khan Mizoramah hnam dang sumdawng, GST hnuaia Registration nei mi 411 an awm thu leh Central Tax Department hnuaiah mi eng emaw zat an awm thu sawiin, hetiang zela Mizoramah hnam dang sumdawng an pun chak chuan tun a\anga kum 2/3 hnu lekah Mizo hnam chu sumdawnna hmanga chim ral mai an hlauthawng hle tih sawiin, hnam dang sumdawng lian Vishal leh Bazar India chuan Mizoramah nghet takin bu an khuar tawh a, tunah hian Big Mart-in Khatla-a inbun an tum mek bawk a, Big Bazar pawhin Mizorama lo luh dan an ngaihtuah mek nia sawiin, heng sumdawng liante hi Mizoram leh hnam tan an him loh theih avangin ngaihtuahna zau zawk sen a hun tawh hle niin Pu PC Laldinthara chuan a sawi a ni.
