Mizorama tlawmngai pawl hrang hrang intel khawm, Joint NGO Coordination Committee-in sorkar laipuiah Citizenship Amendment Bill, 2016 duh lohna Memorandum an thehlut a. Joint Parliamentary Committee on Citizenship Amendment Bill, 2016 Chairman, Pu Satyapal Singh chu tun hnaiah Minister of State atana lak luh a nih avanga he Committee Chairman a nihna a bansan avangin Lok Sabha Secretariat-a he bill khawitu ber, Joint Secretary, Pi Kalpana Sharma hnenah nimin khan Memorandum hi an thehlut a ni. Pi Kalpana Sharma chuan, ram chhung hmun hrang hrang atangin mi 9,000 chungin Citizenship Amendment Bill, 2016 duh lohna hi an thehlut tawh niin Joint NGO Coordiantion Committee hruaitute hi a lo hrilh a, he Bill ngaihtuahtu Committee Chairman chu Union Minister of State atana ruat a nih avangin a aiawh tur Chairman thar ruat thuai a nih a rin thu leh Chairman thar hova bawhzui chhunzawm a nih tur thu a sawi bawk. Joint NGO hruaitute hian Pi Kalpana Sharma chu kumin November thlaa JPC on Citizenship Amendment Bill, 2016-in state thenkhat an fan hunah Mizoram pawh tlawh ve turin an sawm nghal a ni.
An lehkha thehluhah hian Citizenship Amendment Bill, 2016-in a sawi anga Afghanistan, Bangladesh leh Pakistan atanga Hindu, Sikh, Buddhist, Jain, Persi leh Kristian lo lutte, India khua leh tui nihna pek an nih chuan sakhaw zalenna atan a him loh theih thute, Mizoram chu Bangladesh nena ramri thui tak neih a nih avangin dan lova Chakma lo lut ru an awm thin thu leh, Chakma-te chu Buddhist an nih avangin an tan India khua leh tui nih theihna zau taka a inhawn tur thu leh he Bill hi ram dangte nena inri State-te tan a him loh theih avangin an duh loh thu leh an dodal thu an ziak a ni. Nimina Joint NGO Coordination Committee-in Memorandum an thehluhnaah hian Central YMA atangin President Pu Lalbiakzuala leh Treasurer Pu J. Lalsailova; MZP atangin President Pu Lalsangzuala Ngente leh General Secretary Pu L. Ramdinliana Renthlei leh MSU atangin General Secretary Pu Lalthanzuala leh Finance Secretary Pu B. Lalkhawngaihzuala an tel a, New Delhi-a Mizoram House Assistant Resident Commissioner, Pu David Lalthantluanga leh Delhi Mizo Zirlai Pawl hruaituten an tawiawm bawk. He Memorandum-ah hian Joint NGO-a tel pawl 5 – Central YMA, MUP, MHIP, MZP leh MSU President theuh bakah Political Party atangin MPCC, MNF, ZNP, MPC leh BJP President-in hming an ziak a ni.
