Central Pool atanga kumina Mizoramin Medical Course zirna seat a chan zat chu nikum aiin 8-in a tlem. Sorkar laipuia Health & Family Welfare Ministry chuan Xirtawpni khan Central Pool atanga Mizoramin Medical seat a chan zat tur hi a tichhuak a, Mizoram tan hian MBBS-ah seat 17 leh BDS-ah seat 3, a vaiin seat 20 dah a ni a. MBBS-ah hian nikum khan Mizoramin Central Pool atangin seat 25 a chang a, kuminah hian 8-in a tlem ta zawk a ni. MBBS leh BDS zir tura Mizoramin Central Pool atanga seat 20 a hmun bakah hian North Eastern Council (NEC) hnuaiah seat 11 a chang a, NEC hnuaia zir turte tan hian kumin July ni 20 khan Counselling neih a ni tawh a, Admission pawh an tifel vek tawh a ni. H&TE, Technical Wing-a Joint Director, Pu K. Zodingliana chuan, Central Pool atanga Mizoramin Medical seat a hmuh zat tihtlem a nih chhan hi hriat theih a ni lo niin a sawi a, a hriat theih chinah tun hi tum khata Mizoram seat tihtlem nasat ber tum nia a hriat thu a sawi. Pu K. Zodingliana chuan, Central Pool atanga MBBS leh BDS zir turte hian tun thla ni 30 ral hmaa Admission an tih hman vek a ngai tawh nia sawiin, zirlaite hi an tlai palh a hlauhawm avangin a rang thei ang bera Counselling buatsaih a ngai tih a sawi a. Mizoram seat tihtlem a nih chungchanga sorkar laipui hotute dawr tur hian vawiin khan H&TE Minister Pu R. Romawia leh Secretary, Pu Benjamin-a’n New Delhi an pan tih sawiin, an thu ngaichang chunga thutlukna siam thuai a nih tur thu a sawi.
Zonet zawhna chhangin H&TE Minister, Pu R. Romawia chuan, Central Pool atanga Mizoramin Medical seat a hmuh zat chu kum dang aia a pun beisei a nih laiin nikum aia seat 8 laia a tlem zawk chu pawi a tih thu a sawi a. Mizoramin Medical College a la neih loh avangin Central Pool leh NEC atanga seat hmuh thin chu Mizoram innghahna ber a ni tih sawiin, Mizoram seat chan chu tihpun leh a nih theih nan thuneitute an dawr tur thu leh, an hlawhtlin dawn leh dawn loh erawh chu sawi theih a la nih loh thu a sawi a ni.
