A lawmna pui ber Aizawl Vanapa Hall-a buatsaih hi Chief Secretary Pu Lalnunmawia Chuaungo-in a kaihruia a, Larsap Pu P.S. Sreedharan Pillai chuan, state puitlinga Mizoram hlangkai tura zalenna sualtute inpekna te, Mizo mipuite thlawpna, thawhrimna leh tawrhna zawng zawng chhutletin “Mizoram State Day” chu a hluin ropui taka lawm a phu a ni a ti a, Mizoramin remna leh muanna a neih chu hruaituten tharum thawhna aia an vawn tlat chuan remna tluantling a awm zel dawn a ni a ti a, hetihrual hian state intodelh ni thei tura hmalak a \ul hle tih a sawi.
Larsap chuan, thil \henkhatah Mizoramin chhuanawmna nei mahse \an lakna tur tam tak a la awm tih a sawi a, a bikin hmasawnna kawngah sorkar hnathawkte chu hmahruaitu tur leh mipuite kaihruaitu tura mawhphurna sang tak pek an nih thu a sawi a, a lian ber atanga a te ber thlenga phur taka an thawh a ngai a ni a ti. Larsap chuan State intodelh ni turin sorkarin hma a la mek tih a sawi a, leilung hausakna haichhuah kawngah \an lak a ngaih thu te, kawng tam taka Mizoramin theihna a neihte hman \angkai a \ul thu te a sawi a, Mizoram budget thar chu lungawithlak a tih thu leh state \henkhatin deficit budget an kalpui mek laia Chief Minister leh a thawhpui ten Surplus budget an chhawp chhuak thei chu phurawm a tih thu a sawi a, sorkar laipuiin hmarchhak te tana sum zaa 10 a dah chu tam zawk hai chhuak tura tan lak a \ul tih a sawi.
Larsap chuan, zu leh ruihlo bakah AIDS/HIV, Cancer, Thisensang, Zunthlum leh thildang do kawngah thapui thawha \an lak a ngai tih a sawi a, heng thilte hian Mizoram chu a dinhmun tur aia hniamah a dah mek a, awmze nei taka Sorkar, Kohhran, NGO leh mipuiten \ang tlanga an do a ngai tawh a ni a ti.
All NGO Co-ordination Committee Chairman Pu Vanlalruata pawhin thusawiin Aizawl khawpui-a mipui an pung zel chuan harsatna a thlen mek a ni a ti a, thingtlang lam mipuite khawsak phung chu Aizawl ang thoa awlsam a nih theihna tura \anlak a \ul a ni a ti a, HIV AIDS dona kawngah nasa leh zuala \anlak \ul a tih thu a sawi bawk.
India sorkar leh MNF ten kum 1986 June ni 30 a inremna an ziah khan Mizoram chu State puitlinga hlankai tur tia dah a ni a, kum 1987 February ni 20 ah UT atangin State puitlingah Mizoram chu hlan kai a lo ni ta a ni. He Ni lawmna inkhawmah hian Speaker, Minister, MLA leh Sorkar hnawthawkte leh hnam sipai lo ni tawh te an tel a ni.
